217
O‘zbekistonda yo‘l harakati qoidalariga amal qilmaslik, ayniqsa piyodalar xavfsizligiga tahdid soluvchi holatlar uchun jazo kuchaytirildi. Prezident 10 aprel kuni imzolagan qonunga muvofiq, Ma’muriy javobgarlik to‘g‘risidagi kodeksga qator muhim o‘zgartirish va qo‘shimchalar kiritildi.
Trotuar, velosiped yo‘lkalari va yashil hududlar — haydovchilar uchun taqiqlangan!
Endilikda transport vositasini trotuar, piyodalar va velosiped yo‘lkalaridan, shuningdek ularga tutash yashil hududlardan haydash qonunbuzarlik hisoblanadi. Yo‘l harakati ishtirokchilariga to‘siq yaratish, noqonuniy qurilma o‘rnatish yoki maxsus ajratilgan avtobus tasmasida yurish ham ma’muriy jazoga sabab bo‘ladi.
Jarimalar miqdori qanday?
Qonunga ko‘ra, yo‘nalishli transport vositalariga mo‘ljallangan alohida tasmadan boshqa transport vositasini haydash:
- birinchi marta qoida buzilsa — BHMning 1 baravari (ayni paytda 340 ming so‘m) miqdorida jarima solinadi;
- agar shu huquqbuzarlik 1 yil ichida takrorlansa — BHMning 3 baravari, ya’ni 1 million 20 ming so‘mgacha jarima belgilanadi.
Qoida buzganlarga qarshi keskin choralar
Yo‘llarda tartib va xavfsizlikni ta’minlash maqsadida davlat organlari tomonidan ushbu o‘zgarishlar bilan bog‘liq nazorat yanada kuchaytiriladi. Ayniqsa trotuar va piyodalar yo‘laklarini noqonuniy egallayotgan haydovchilar endilikda jiddiy jazoga duch kelishi kutilmoqda.
Eslatma haydovchilarga:
Piyodalar uchun mo‘ljallangan hududlar — harakat qulayligi emas, balki inson hayoti xavfsizligi uchun xizmat qiladi. Qoidaga amal qilmaslik nafaqat jarima, balki halokatli oqibatlarga ham sabab bo‘lishi mumkin. “Zamin”ni Telegramʻda oʻqing!
Kecha, 17:32
