O‘zbekiston va Sloveniya mehnat migratsiyasi bo‘yicha hamkorlikni kengaytirmoqda

^{Foto: "Dunyo" AA}
O‘zbekistonning Vengriyadagi (Budapesht) elchisi Oybek Shaxavdinov Sloveniya poytaxti Lyublyanada mamlakatning mehnat, oila, ijtimoiy masalalar va teng imkoniyatlar vaziri Luka Meses bilan muzokaralar o‘tkazdi.

Uchrashuvda mehnat munosabatlari, migratsiya va ijtimoiy himoya sohalaridagi ikki tomonlama hamkorlik masalalari muhokama qilindi.

Yevropa Ittifoqi – Markaziy Osiyo hamkorligi kontekstida yangi bosqich

Tomonlar ta’kidlaganidek, yaqinda o‘tkazilgan “Yevropa Ittifoqi – Markaziy Osiyo” sammiti ikki mintaqa o‘rtasidagi munosabatlarni kengaytirishda yangi imkoniyatlar eshigini ochdi. Bu, xususan, migratsiya va mehnat sohalaridagi hamkorlikni mustahkamlash uchun muhim bosqich hisoblanadi.

O‘zaro manfaatdorlik: Sloveniya bozoriga o‘zbekistonlik mutaxassislar kerak

Muzokaralar davomida ikki davlat mehnat bozorlarini o‘zaro to‘ldirish masalalariga e’tibor qaratdi. Sloveniya tarafi iqtisodiyotning bir qator tarmoqlari uchun o‘zbekistonlik mutaxassislardan manfaatdor ekanini bildirdi.

Shu nuqtayi nazardan, hukumatlararo kelishuv imzolash imkoniyatlari, mehnatkashlarni ijtimoiy muhofaza qilish, ularni ishga joylashtirish va huquqlarini ta’minlash masalalari alohida muhokama qilindi.

Markaziy Yevropada o‘zbekistonlik mutaxassislarga yo‘l ochilyapti

Sloveniya – Yevropa Ittifoqiga a’zo davlatlar orasida barqaror va inklyuziv mehnat siyosatiga ega mamlakatlardan biri. O‘zbekistonning ushbu davlat bilan mehnat sohasidagi munosabatlarni yo‘lga qo‘yayotgani — nafaqat iqtisodiy, balki inson kapitali sohasida ham muhim qadam sanaladi. “Zamin”ni Telegramʻda oʻqing!