Qirg‘izistondan O‘zbekistonga noqonuniy ravishda olib kelingan umumiy qiymati 5,7 mlrd so‘mlik zargarlik buyumlari Davlat xavfsizlik xizmatining Farg‘ona viloyati bo‘yicha boshqarmasi xodimlari tomonidan tezkor tadbir o‘tkazish orqali to‘xtatib qolindi.
Tadbir Bojxona organlari bilan hamkorlikda amalga oshirildi. Ma’lumotlarga ko‘ra, Farg‘ona tumanida yashovchi 1987-yilda tug‘ilgan fuqaro qirg‘izistonlik shaxs aylanma yo‘llar orqali “o‘zbek-qirg‘iz” davlat chegarasidan qonunga zid ravishda mamlakatimizga o‘tkazib berilgan katta miqdordagi zargarlik buyumlarini qabul qilib olgan.
So‘ngra, moddiy manfaat maqsadida, ularni Farg‘ona shahrida kutib turgan, Andijon viloyati Jalaquduq tumanida yashovchi 1997-yilda tug‘ilgan shaxsga yetkazib bergan paytda, har ikki shaxs ham qo‘lga olindi.
Tilladan yasalgan ushbu zargarlik buyumlarining jami og‘irligi 5 kg 706 grammni tashkil etadi va dastlabki bahoga ko‘ra, ularning umumiy qiymati 5 mlrd 746 mln so‘mga teng.
Hozirda mazkur shaxslarga nisbatan tergovgacha tekshiruv va surishtiruv harakatlari olib borilmoqda, ularning noqonuniy harakatlari va moliyaviy manfaatlari aniqlanishiga qaratilgan ishlar davom ettirilmoqda.
Ushbu amaliyot kontrabanda va qonuniy yo‘lsiz tovar-moddiy boyliklar kirishini oldini olishda muhim qadam sifatida baholanmoqda.
“Zamin”ni Telegramʻda oʻqing!
