Chinoz tuman sudida ko‘pchilikni titratgan qotillik ishi bo‘yicha hukm o‘qildi. Sud 16 yoshli o‘smirni o‘z sinfdoshini o‘ldirgani uchun 8,5-yilga ozodlikdan mahrum etdi.
Fojiali hodisa 6 iyun kuni Yallama qishlog‘ida ro‘y bergan edi. Tergov materiallariga ko‘ra, jabrlanuvchi onasi bilan telefon orqali suhbatlashgach, qisqa vaqtga do‘stlari bilan ko‘rishib kelishini aytgan va uyidan chiqqan. Biroq uning ortidan qora xabar keldi — o‘spirinning jasadi ko‘plab pichoq zarbalari bilan qishloq uylaridan biri yonidan topildi. Keyinchalik ma’lum bo‘lishicha, qotillik mahalliy futbol maydoni hududida amalga oshirilgan.
Sud jarayonida ayblanuvchi yosh yigit qilmishi tasodifiy sodir bo‘lganini ta’kidlab, chuqur pushaymonligini bildirdi va kechirim so‘radi. Shu bilan birga, yengilroq jazo qo‘llanilishini ham iltimos qildi.
Biroq sud ishi davomida barcha dalillar ko‘rib chiqilib, ayblanuvchi Jinoyat kodeksining 97-moddasi 1-qismi (qasddan odam o‘ldirish) hamda 85-moddasi (ozodlikdan mahrum qilish) asosida aybdor deb topildi. Unga 8,5-yil muddatga ozodlikdan mahrum qilish jazosi tayinlandi.
Shu tariqa, Chinozdagi qotillik ishi yuzasidan hukm chiqarildi. Bu voqea nafaqat mahalliy aholi, balki butun jamoatchilik orasida ham qattiq iztirob uyg‘otdi. Sud qaroridan ko‘rinib turibdiki, jazo muqarrar va qonun oldida hamma javobgar.
“Zamin”ni Telegramʻda oʻqing!
