Toshkent viloyatida bog‘chalarda sodir bo‘lgan ommaviy zaharlanish voqeasi bo‘yicha olib borilayotgan jinoyat ishi tergovi doirasida yetti nafar shaxsga nisbatan qamoq ehtiyot chorasi qo‘llandi. Bu haqda Kun.uz manbasi ma’lumot tarqatdi.
Ma’lum qilinishicha, ushlanganlarning uch nafari – zaharlanishga sabab bo‘lgani taxmin qilinayotgan oziq-ovqat ishlab chiqaruvchi korxona rahbarlari va mas’ul shaxslari hisoblanadi. Yana to‘rt kishi esa bog‘chalarga mahsulot yetkazib beruvchi autsorsing kompaniyalari xodimlari ekani aytilmoqda.
Jinoyat ishi dastlab viloyat Ichki ishlar bosh boshqarmasi tomonidan yuritilgan bo‘lsa, keyinchalik tergov Ichki ishlar vazirligiga topshirilgani ma’lum qilindi.
Avvalroq Sanepidemiya nazorati xizmatining ma’lumot berishicha, zaharlanishdan jabrlangan bolalarga «o‘tkir gastroenterit» tashxisi qo‘yilgan. Umumiy hisobda 963 nafar tarbiyalanuvchi kasallikka chalingan. Ulardan 269 nafari shifoxonadan sog‘ayib chiqib ketgan bo‘lsa, yana 421 bolaga sog‘lomligi tiklangani uchun 27 sentyabr kuni uyiga javob berilishi kutilmoqda.
Shu bilan birga, 13 nafar bolaning ahvoli hanuz o‘rtacha og‘ir ekani ta’kidlandi. Mutaxassislar ularni shifokorlar qat’iy nazorati ostida davolash ishlarini davom ettirayotganini ma’lum qilmoqda.
Aniqlanishicha, mazkur ish bo‘yicha ayblanuvchilarga nisbatan Jinoyat kodeksining tegishli moddalari asosida tergov harakatlari olib borilmoqda va ayrim dalillar jinoyatga aloqador shaxslarning aybini tasdiqlashi mumkinligi aytilmoqda.
Hozirda ushbu jinoyat ishi jamiyatda katta qiziqish uyg‘otmoqda. Chunki masala nafaqat sog‘liqni saqlash tizimi, balki bog‘chalardagi ta’minot va nazorat tizimi samaradorligi haqida jiddiy savollarni kun tartibiga olib chiqdi.
Shu boisdan, mutaxassislar bu ishda nafaqat aybdorlarni aniqlash, balki bundan keyin bunday holatlarni oldini olish bo‘yicha kompleks chora-tadbirlar ko‘rilishi zarurligini ta’kidlashmoqda.
“Zamin”ni Telegramʻda oʻqing!
