Samarqand viloyatida qo‘y o‘g‘irlashda gumon qilingan 64 yoshli ayol tergov jarayoni davomida vafot etdi. Bu haqda “Ezguluk” inson huquqlari jamiyati raisi Abdurahmon Toshanov o‘zining ijtimoiy tarmoqdagi sahifasida ma’lum qildi.
Ma’lumotlarga ko‘ra, u joriy yilning 25-iyul kuni ehtiyot chorasi sifatida qamoqqa olingan va Samarqanddagi 7-sonli tergov izolyatoriga joylashtirilgan. Gumonlanuvchi qandli diabet kasalligi bilan og‘rigan bo‘lishiga qaramay, uning sog‘lig‘iga e’tibor berilmagan. Himoyachilar tomonidan tibbiy ekspertiza tayinlash haqida bir necha bor iltimos qilingan bo‘lsa-da, bu talab rad etilgan.
Ayolning ahvoli keskin yomonlashgach, u Toshkentdagi maxsus tibbiy muassasa — “Sangorod” shifoxonasiga olib borilgan. Biroq u yerda qisqa muddat davolangandan so‘ng yana izolyatorga qaytarilgan. Oradan ko‘p o‘tmay, u vafot etgani haqida xabar berildi.
Hozircha rasmiy idoralar — Ichki ishlar, Prokuratura yoki To‘g‘riq xizmati tomonidan hodisa yuzasidan izoh berilmagan. Ammo jamoatchilik va inson huquqlari faollari bu holatni jiddiy nazoratga olishni so‘ramoqda.
“Ezguluk” tashkiloti vakillarining ta’kidlashicha, og‘ir kasallikka chalingan shaxsni qamoqqa joylashtirish va unga zarur tibbiy yordam ko‘rsatmaslik insonparvarlik tamoyillariga ziddir. Ular bu holatni inson huquqlarini qo‘pol ravishda buzish deb baholashmoqda.
Hozirda holat yuzasidan tekshiruv ishlari boshlangani ma’lum qilingan. Faollar tergov muassasalarida tibbiy xizmat sifatini oshirish, kasal gumonlanuvchilarga nisbatan munosabatni qayta ko‘rib chiqish zarurligini ta’kidlamoqda.
Jamoatchilik esa bu voqea yuzasidan xolis surishtiruv o‘tkazilishi va aybdorlar javobgarlikka tortilishiga umid bildirmoqda.
“Zamin”ni Telegramʻda oʻqing!
