Jizzax viloyatida kecha tungi vaqt sodir bo‘lgan yo‘l-transport fojiasi barchani hayajonga soldi. 21-noyabr kuni soat 23:50 atrofida Sh. Rashidov tumani hududidan o‘tuvchi xalqaro ahamiyatga ega M-39 «Toshkent–Termiz» yo‘lining 989-chaqirig‘ida ikki avtomashina ishtirokida ayanchli halokat qayd etildi.
Rasmiy ma’lumotlarga ko‘ra, Qashqadaryo viloyatining Chiroqchi tumanida yashovchi, 2003-yilda tug‘ilgan haydovchi boshqaruvidagi «ISUZU» yuk avtomobili Samarqand yo‘nalishidagi AGQSHdan chiqar ekan, ushbu yo‘l uchastkasida o‘rnatilgan 2.4 — «Yo‘l bering» va 4.1.2 — «Harakatlanish o‘nga» belgilarining talablariga rioya qilmagan. Haydovchi belgilanmagan joydan kesib o‘tishga uringan va shu payt yo‘lning qatnov qismiga chiqib ketgan.
Aynan shu xatolik oqibatida Toshkent–Samarqand yo‘nalishi bo‘ylab harakatlanib kelayotgan, Surxondaryoning Oltinsoy tumanida istiqomat qilgan 2002-yilda tug‘ilgan yigit boshqaruvidagi «Lasetti» yuk mashinasiga borib urilgan. To‘qnashuv shiddati shunchalik kuchli bo‘lganki, yengil avtomobilning dvigatel qismida yong‘in kelib chiqqan va mashina bir zumda yonib ketgan.
Fojia oqibati o‘ta alamli: «Lasetti» haydovchisi va salonda bo‘lgan yana to‘rt nafar yo‘lovchi og‘ir tan jarohatlari olib, hodisa joyida halok bo‘lgan. Qutqaruv xizmatlari voqeaga tez yetib kelgan bo‘lsa-da, ular hayot uchun kүrasha olmagan.
Ayni paytda Jizzax viloyati IIB Tergov boshqarmasi tomonidan jinoyat ishi qo‘zg‘atilgan. Tergov harakatlari O‘zbekiston Respublikasi Jinoyat kodeksining 266-moddasi 3-qismi «a» bandi — «YTH ortidan insonlar o‘limiga sabab bo‘lish» asosida olib borilmoqda.
Hozircha asosiy versiya yuk avtomobili haydovchisining yo‘l qoidalarini qo‘pol ravishda buzishi bo‘lib turibdi. Tergov jarayonida barcha texnik ekspertlar xulosasi, kuzatuv kameralari yozuvlari va guvohlarning ko‘rsatmalari o‘rganiladi.
M-39 kabi katta ahamiyatga ega magistrallardagi harakat qoidalariga befarqlik bir necha sekund ichida qaytarib bo‘lmas oqibatlarga olib kelishi mumkinligi yana bir bor isbotini topdi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
