Chilonzorda erkak narkokuryerlikda ushlandi va ayblandi
Chilonzor tumanida giyohvand moddalarni “zakladka” usulida tarqatgan erkak qo‘lga olindi va unga nisbatan jinoyat ishi qo‘zg‘atildi. U ushlangan paytda Chilonzorning 6, 7, 8 va 9-mavzelari hududida jami 20 ta yashirin joy qoldirganini tan olgan. Erkak Instagram’dagi avtoyuvish shoxobchasiga ish e’loni orqali jalb qilinib, keyinchalik tahdidlar ostida uch oy davomida giyohvand moddalar tarqatgani aytilmoqda. Unga 20 yilgacha ozodlikdan mahrum etish jazosi tahdid solmoqda.
Toshkent shahar IIBB matbuot xizmati xabariga ko‘ra, tezkor tadbir davomida Chilonzor tumanida giyohvand moddalarni “zakladka” usulida tarqatib kelgan erkak qo‘lga olindi. Bu haqda upl.uz xabar beradi.
Huquq-tartibot xodimlari ma’lumotiga ko‘ra, u ushlangan paytda Chilonzorning 6, 7, 8 va 9-mavzelari hududida jami 20 ta yashirma joy qoldirib ulgurganini tan olgan. Mazkur “zakladka”lar daliliy ashyo sifatida olib qo‘yildi.
Tekshiruv jarayonida aniqlanishicha, erkak ish izlab yurgan paytda Instagram’da avtoyuvish shoxobchasiga ish e’loni ko‘rib qolgan. Telegram orqali bog‘langach, unga oddiy kuryerlik taklif qilinadi va u hujjatlarini yuborib rozi bo‘ladi.
Keyinroq esa undan giyohvand moddalarni tarqatish talab qilingani, rad etmoqchi bo‘lganida esa tahdidlar bilan bosim o‘tkazilgani aytilmoqda. Natijada u uch oy davomida noqonuniy faoliyat bilan shug‘ullangan.
Ushbu holat yuzasidan O‘zbekiston Respublikasi Jinoyat kodeksining giyohvandlik vositalari bilan bog‘liq noqonuniy muomalaga doir 5-qismi bilan jinoyat ishi qo‘zg‘atildi. Gumonlanuvchiga 20 yilgacha ozodlikdan mahrum etish jazosi tahdid solmoqda.
Izohlar 0
…