Toshkent shahri Mirzo Ulug‘bek tumani soliq inspeksiyasi boshlig‘i Dilshod Usmonov lavozimidan ozod etildi. Bu haqda prezident Shavkat Mirziyoyev raisligida o‘tgan videoselektor yig‘ilishida ma’lum qilindi.
Yig‘ilishda qayd etilishicha, mazkur amaldorga nisbatan o‘tgan hafta jinoyat ishi qo‘zg‘atilgan. Tekshiruvlarda Usmonov inspeksiya binosining bir qismini shaxsiy manfaat uchun ijaraga bergani va tushgan mablag‘dan 315 million so‘mni o‘zlashtirgani aytildi.
Shuningdek, uning xizmat faoliyatida guruhchilikka moyillik, hamda xizmat etikasiga to‘g‘ri kelmaydigan hayot tarziga berilib ketgani haqida ham tanqidiy fikrlar bildirilgan.
Videoselektorda poytaxtdagi ayrim soliq rahbarlari tushumni oshirish, soliq bazasini kengaytirish, yashirin iqtisodni qisqartirish o‘rniga “taniqli tadbirkorlar”ga suyanch bo‘lib, ayrimlariga alohida imtiyozdek munosabat qilish bilan band ekani keskin ko‘rsatib o‘tildi. Bu esa adolatli raqobat va tartibli soliq tizimi uchun xavfli signal ekani ta’kidlandi.
Olib borilgan tekshiruvlar natijasida shaharda 70 milliard so‘m soliq hisob-kitobdan chetda qolgani aniqlangan. Ya’ni ayrim faoliyatlar yoki aylanmalar to‘liq qamrab olinmagan, soliq hisoblanishi lozim bo‘lgan summalar hisobga kiritilmagan.
Rasmiy ma’lumotlarga ko‘ra, so‘nggi ikki yilda Toshkent shahar soliq idoralarining 19 nafar xodimi korrupsiya bilan bog‘liq holatlar bo‘yicha jinoiy javobgarlikka tortilgan. Bu ishlar oqibatida byudjetga 27 milliard so‘m zarar yetgani ham aytib o‘tildi.
Xulosa shuki, soliq tizimida ishonch masalasi eng nozik nuqta. Chunki bu yerda bitta rahbarning xatosi faqat bir idora bilan cheklanmaydi: byudjet, tadbirkorlik muhiti va odamlarning adolat hissigacha ta’sir qiladi. Endi asosiy savol — tekshiruvlar faqat “baland ovozli” holatlardagina emas, tizimli ravishda ham davom etadimi yoki yo‘q.
“Zamin”ni Telegramʻda oʻqing!
