Namangan viloyati Chust tumanida 49 yil muddatga fermer xo'jaligiga ijaraga berilgan 5 gektar davlat yerini noqonuniy sotish bilan bog'liq yirik firibgarlik urinishining oldi olindi. Bu haqda podrobno.uz xabar beradi.
Huquqbuzar uchastkani 60 ming dollarga baholab, xaridorni ishontirish uchun Chust tumani hokimiyatida “tanish-bilishlari” borligini aytgan. U, shuningdek, yerning bir qismini noqonuniy tarzda maqomini o'zgartirib, qishloq xo'jaligiga mo'ljallangan 8 sotix maydonni yakka tartibdagi uy-joy qurilishi (IJQ) uchun rasmiylashtirib berishni va'da qilgan.
Kelishuv pul topshirish jarayonida barbod bo'ldi. Jinoyat qidiruv xodimlari va prokuratura gumonlanuvchini 30 ming dollar avans olayotgan paytda qo'lga oldi, mablag'ning barchasi uchrashuv joyining o'zida ashyoviy dalil sifatida olib qo'yildi.
Mazkur holat yuzasidan “Juda ko'p miqdorda firibgarlik” moddasi bilan jinoyat ishi qo'zg'atildi. Tergov doirasida gumonlanuvchining mahalliy idoralarda sheriklari bo'lgan-bo'lmagani ham aniqlanmoqda.
Avvalroq Samarqand viloyatida ham shunga o'xshash holat qayd etilib, fermer xo'jaligi rahbari yer uchastkasini qariyb 200 ming dollarga noqonuniy sotishga uringan paytda ushlangani xabar qilingandi.
“Zamin”ni Telegramʻda oʻqing!
