Poytaxtimizda bahorning eng yorqin va ko‘tarinki tadbirlaridan biri bo‘lishi kutilayotgan Flowers Fest festivaliga tayyorgarlik ishlari deyarli yakunlandi. Toshkent shahar hokimligi “Tashkent Love Fest” hududida olib borilayotgan so‘nggi ishlardan fotolavhalarni taqdim etdi.
Ma’lum qilinishicha, 7-9 may kunlari o‘tkaziladigan ushbu festival davomida shahar aholisi va mehmonlarini gullar bilan bezatilgan maxsus installyatsiyalar, qiziqarli shou dasturlar va turli mavzudagi ko‘ngilochar chiqishlar kutib turibdi.
Tashkilotchilarning ta’kidlashicha, festival mehmonlariga nafaqat chiroyli manzaralar, balki haqiqiy bayram kayfiyati va yorqin taassurotlar ulashish maqsad qilingan. Shu sababli maydonda turli fotozonalar, dam olish hududlari va maxsus dekoratsiyalar o‘rnatilmoqda.
Ayni vaqtda asosiy sahna, gulli kompozitsiyalar va bayramona bezaklarni montaj qilish ishlari yakuniy bosqichga kirgan. Hudud kechki yoritish tizimlari bilan ham bezatilmoqda, bu esa festivalga yanada go‘zal muhit bag‘ishlashi kutilmoqda.
Ma’lumot uchun, Flowers Fest 7 maydan 9 maygacha davom etadi. Eng muhimi, tadbirga kirish barcha uchun mutlaqo bepul bo‘ladi.
Tashkilotchilarning fikricha, ushbu festival poytaxtda bahoriy kayfiyatni yanada kuchaytirib, oilalar, yoshlar va sayyohlar uchun unutilmas dam olish maskaniga aylanishi mumkin. Toshkentliklar esa allaqachon ijtimoiy tarmoqlarda festivaldan kutilmalarini faol muhokama qilishni boshlab yuborgan.
“Zamin”ni Telegramʻda oʻqing!
