Toshkent shahrida 22 may kuni transport harakatiga vaqtinchalik cheklovlar kiritiladi. Bu qaror O‘zbekiston milliy terma jamoasini Jahon chempionatiga kuzatish munosabati bilan o‘tkaziladigan tadbirlar doirasida qabul qilingan.
Ma’lum qilinishicha, cheklovlar soat 16:00 dan 21:00 gacha amalda bo‘ladi. Shu vaqt oralig‘ida poytaxtning bir qator asosiy ko‘chalarida transport harakati vaqtincha to‘xtatiladi yoki cheklanadi. Maqsad — tadbirni xavfsiz va tartibli tashkil etish, fuqarolar hamda harakat ishtirokchilari xavfsizligini ta’minlashdan iborat.
Ayniqsa, Chilonzor va unga tutash hududlarda harakatlanuvchi haydovchilar ushbu o‘zgarishlarni oldindan hisobga olishi kerak. Chunki cheklovlar ishdan qaytish vaqtiga to‘g‘ri kelishi mumkin va bu ayrim yo‘nalishlarda tirbandlikka sabab bo‘lishi ehtimoldan xoli emas.
22 may kuni quyidagi hududlarda transport harakati vaqtincha cheklanadi:
Cho‘ponota ko‘chasida — Chilonzor ko‘chasi kesishmasidan Qatortol ko‘chasigacha bo‘lgan qismda;
Chilonzor ko‘chasida — KXAYdan Cho‘ponota ko‘chasi bilan kesishguncha bo‘lgan yo‘nalishda;
Bunyodkor ko‘chasining ikkinchi darajali qismida — KXAYdan Cho‘ponota ko‘chasigacha;
Sebzor ko‘chasida — Nurafshon ko‘chasidan Islom Karimov va Bunyodkor ko‘chalari chorrahasigacha;
Bunyodkor ko‘chasida — Islom Karimov ko‘chasi bilan kesishgan chorrahadan 2-Qatortol ko‘chasigacha bo‘lgan qismda.
Mas’ullar haydovchilardan shu vaqt oralig‘ida ushbu yo‘nalishlardan foydalanmaslikni, safarni oldindan rejalashtirishni va aylanma yo‘llarni tanlashni so‘ramoqda. Jamoat transportidan foydalanuvchilar ham harakat jadvalida o‘zgarishlar bo‘lishi mumkinligini inobatga olishlari maqsadga muvofiq.
O‘zbekiston milliy terma jamoasini Jahon chempionatiga kuzatish mamlakat futboli uchun tarixiy voqealardan biri hisoblanadi. Shu bois poytaxtdagi tadbirga katta qiziqish bo‘lishi kutilmoqda. Bunday paytda xavfsizlik choralari kuchaytirilishi va harakat cheklovlari joriy qilinishi tabiiy hol.
Qisqasi, 22 may kuni Toshkentda yo‘lga chiqadiganlar vaqtni to‘g‘ri taqsimlashi kerak. Terma jamoani katta sahnaga kuzatamiz, lekin tirbandlikda qolib ketmaslik ham o‘zimizga bog‘liq. Oldindan yo‘nalishni belgilab olgan haydovchi — yarim g‘alabaga erishgan haydovchi.
“Zamin”ni Telegramʻda oʻqing!
