Bugun, 23 may kuni Toshkent viloyatining Piskent tumani hududidan oqib o‘tuvchi Ohangaron daryosida xavfli holat yuz berdi. Daryo o‘rtasidagi kichik quruqlikda bir nafar ayol qolib ketib, qutqaruvchilar yordamiga muhtoj bo‘lgan.
Favqulodda vaziyatlar vazirligi ma’lumotiga ko‘ra, soat 10:20 atrofida Olmaliq shahar Favqulodda vaziyatlar bo‘limiga mazkur holat yuzasidan shoshilinch xabar kelib tushgan. Xabarda daryo o‘rtasidagi hududda fuqaro qolib ketgani va uning xavfsizligi ta’minlanishi zarurligi ta’kidlangan.
Aniqlanishicha, daryoda suv sathi kutilmagan tarzda keskin ko‘tarilib, oqim kuchayib ketgan. Shu sababli ayol mustaqil ravishda qirg‘oqqa chiqish imkoniyatidan mahrum bo‘lgan va xavfli vaziyatda qolib ketgan.
Voqea joyiga tezkorlik bilan yetib kelgan qutqaruvchilar maxsus jihozlar yordamida qutqaruv ishlarini amalga oshirgan. Ular ayolni daryo o‘rtasidan ehtiyotkorlik bilan olib chiqib, xavfsiz hududga yetkazgan.
Ma’lum qilinishicha, hodisa oqibatida ayol jarohat olmagan. Mutaxassislar esa bunday vaziyatlarda daryolar yaqinida ehtiyotkor bo‘lish, suv sathidagi o‘zgarishlarga e’tibor qaratish muhimligini yana bir bor eslatmoqda.
“Zamin”ni Telegramʻda oʻqing!
