Foto: DXX
Andijon viloyatining Marhamat tumanida kuchli ta’sir qiluvchi modda saqlangan mahsulotni sotish bilan bog‘liq holat fosh etildi. Tezkor tadbir davomida 1991 yilda tug‘ilgan fuqaro tuman markazidagi savdo majmuasida shartli xaridorga 900 dona “Keto coffee mix” mahsulotini 6 million so‘mga sotayotgan vaqtda ashyoviy dalillar bilan ushlandi.
Surishtiruv jarayonida ushbu mahsulot Andijon shahridagi “Jahon savdo kompleksi”da joylashgan do‘kondan xarid qilingani ma’lum bo‘ldi. Shundan so‘ng tezkor tadbir davom ettirilib, Andijon shahrida yashovchi, 1987 yilda tug‘ilgan fuqaroga tegishli savdo nuqtasi ham tekshirildi. Do‘kondan yana 480 dona “Keto coffee mix” mahsuloti olib qo‘yildi.
Ashyoviy dalil sifatida musodara qilingan mahsulotlarning umumiy og‘irligi 11 kilogrammni tashkil etdi. Tekshiruv natijasida mazkur mahsulot tarkibida “sibutramin” kuchli ta’sir qiluvchi moddasi borligi aniqlandi. Qayd etilishicha, ushbu moddaning O‘zbekiston hududida muomalasi taqiqlangan.
Hozirda mazkur holat yuzasidan tegishli shaxslarga nisbatan jinoyat ishi qo‘zg‘atilgan. Tergov organlari mahsulotlarning kelib chiqish manbasi, sotuv zanjiri va ushbu holatga aloqador boshqa shaxslarni aniqlash bo‘yicha harakatlarni davom ettirmoqda.
Qisqasi, Andijonda “ozish mahsuloti” ko‘rinishida sotilayotgan taqiqlangan modda muomalasiga chek qo‘yildi. Bu kabi holatlar yana bir bor eslatadi: nomida “kofe” yoki “fitnes” degan yozuv bo‘lishi mahsulot xavfsizligini anglatmaydi.
“Zamin”ni Telegramʻda oʻqing!
