Surxondaryoda sel Tojikiston bilan bog‘lab turuvchi ko‘prikni qulab tushirdi
Surxondaryo viloyatining Sariosiyo tumanida kuzatilgan kuchli sel oqimi Obizarang daryosidagi M-41 xalqaro avtomobil yo‘lidagi muhim ko‘prik tayanchlariga jiddiy zarar yetkazib, uning qulashiga sabab bo‘ldi. 1977 yilda qurilgan va Tojikiston bilan bog‘lovchi mazkur tranzit yo‘lak orqali soatiga 600–800 ta transport vositasi harakatlangan edi.
21 iyun kuni kuchli yog‘ingarchiliklar sabab Surxondaryo viloyati Sariosiyo tumanidagi Obizarang daryosida suv sathi keskin ko‘tarildi.
Sel oqimi M-41 “Bishkek – Dushanbe – Termiz” xalqaro avtomobil yo‘lidagi ko‘prik tayanchlariga jiddiy zarar yetkazgan.
Dastlabki ko‘rikda inshoot konstruksiyalarida og‘ir shikastlanishlar aniqlangan. Shu sabab ushbu yo‘nalishda transport harakati vaqtincha to‘liq to‘xtatildi.
1977 yilda qurilgan ko‘prik Tojikiston bilan bog‘lovchi muhim tranzit yo‘laklardan biri hisoblanadi. U orqali soatiga 600–800 ta transport vositasi harakatlangan.
Hozirda mutaxassislar voqea joyida ko‘prik holatini o‘rganmoqda, zarar miqdori baholanmoqda va harakatni tiklash choralari ko‘rilmoqda.
Izohlar 0
…