O‘zbekning tushunarsiz odatlari

Mehmon kutish
Biz o‘zbeklarda ajib bir odat bor. Mehmon uchun odatdagidan boshqacharoq tayyorgarlik ko‘rib dasturxon tuzaymiz, alohida bezatilgan xonada kutib olamiz.

Nega? O‘zimiz har doim ovqatlanadigan dasturxon va taom bilan mehmonni ham kutib olsak nima bo‘ladi? Qanday sharoitda yashashimizni bilib qolishadimi?

Mehmon uchun shirinliklar va pista-bodomlar saqlab qo‘yiladi, bola-chaqalar yeb qo‘ymasin deb. U tansiq taomlar oyda-yilda bir kelib ketadigan mehmon uchun atalgan. O‘zimiz va bola-chaqamiz ulardan yemasligi kerak.

Nega?

Ko‘p o‘zbek xonadonlarida mehmonxona deb atalgan maxsus bir xona bo‘ladi. U xonaga chiroyli gilamlar solib, qimmat idish-tovoqlar tuzab qo‘yiladi. Doimiy o‘tiradigan uyimiz esa oshxona yoki biron bir kirchimol uy bo‘ladi.

Nega o‘zimiz oilamiz bilan shu mehmonxonada rohatlanib yashamaymiz? Nega u xona faqat "aziz mehmonlar" uchun saqlab qo‘yiladi. Mehmon asl sharoitimizni ko‘rib, bilib qolmasligi uchunmi?

O‘zbekistondan tashqarida yashayman. Yaqinda boshqa millatdan bo‘lgan bir musulmon tanishim oilaviy iftorga taklif qildi va bordik. Menga eng yoqqan tarafi u hech qanday tayyorgarlik qilmagan. Har doim o‘zlari yeydigan taom va joyda kutib olgani bilinib turibdi. Chunki ularga hech qanday riyo yoki bizdagiga o‘xshash ko‘zbo‘yamachilik kerak emas, deb tushundim.

Alloh bergan rizq va sharoitni nega bandasidan yashirishga harakat qilamiz, hayronman...


Manba: Azon.uz “Zamin”ni Telegramʻda oʻqing!