71 307 nafar aholi Oqoltin, Mirzaobod va Sardobadagi xonadonlariga qaytib keldi

^{Foto: FVV matbuot xizmati}
Sirdaryo viloyatida toshqin oqibatida zarar ko‘rgan uylar, ijtimoiy binolar yana qayta tiklanmoqda. Yashash uchun yaroqsiz uylar buzilib, joylarda muhandislik-kommunikatsiya tarmoqlarini tiklash choralari ko‘rilmoqda, deyiladi FVV xabarida.

Bildirilishicha, ushbu hududlarda Favqulodda vaziyatlar, Ichki ishlar, Mudofaa vazirliklari, Milliy gvardiya hamda Favqulodda vaziyatlarda ularning oldini olish va harakat qilish davlat tizimining kuch va vositalari tomonidan keng ko‘lamli ishlar olib borilmoqda. Mazkur tadbirlar Favqulodda vaziyatlar vazirligi tomonidan muvofiqlashtirilmoqda.

Qayd etilishicha, 71 307 nafar aholi Oqoltin, Mirzaobod va Sardoba tumanidagi xonadonlariga qaytib keldi.

Milliy gvardiya xodimlari tomonidan 343 vayron bo‘lgan uylarda tozalash ishlari olib borilgan bo‘lsa, prokuratura vakillari 6107 ta kadastr hujjatlaridan 3338 tasi qayta tiklashga erishdilar. Bundan tashqari, yo‘qolgan 3 517 pasportdan 482 ta, 61 ta haydovchilik guvohnomadan 11 tasi qayta tiklandi.

Umumiy maydoni 1 213,796 kvadrat metr bo‘lgan 1604 ob’ektda Mudofaa vazirligining 8 ta maxsus bo‘linmasi tomonidan dezinfeksiya ishlari olib borildi.

Ta’kidlanishicha, bu kabi tadbirlar qo‘shni Qozog‘istonda ham olib borilmoqda. Turkiston viloyati Yettisoy va Maxtaral tumanlarining toshqindan zarar ko‘rgan hududlarida 70 000 dan ortiq kub.metr suv tortib chiqarildi, 6500 metr uzunlikda kollektor qazish va tozalash ishlari amalga oshirildi. Tadbir davomida 11 000 kub.metr chiqindilar olib tashlandi.

Tabiiy ofat oqibatlarini bartaraf etish ishlari davom etmoqda, deyiladi vazirlik ma’lumotida. “Zamin”ni Telegramʻda oʻqing!