IIBB: To‘ydagi «o‘q uzishlar» montaj bo‘lib chiqdi

Internet tarmog‘ida to‘ydagi mehmonlardan biri osmonga qarata to‘pponchadan o‘q uzayotgani aks etgan video tarqaldi.
Mazkur video Toshkent shahar IIBB tomonidan o‘rganildi, videodagi odamlarning, xususan, o‘q uzgan kishining shaxsi aniqlandi.

O‘q uzgan kishi – Toshkent viloyatilik 25 yoshli Salixov Ulug‘bek ekanligi ma’lum bo‘ldi. Uning so‘zlariga qaraganda, u qarindoshi bo‘lmish kuyovga to‘y kuni kuyov-jo‘ralik qilgan.

19 sentabr kuni kuyov va uning do‘stlari Chilonzor tumaniga kelinning uyiga kelishganida, Ulug‘bek keyinchalik «qiziqarli rolik» tayyorlash uchun bozordan sotib olgan o‘yinchoq to‘pponchani osmonga ko‘targan. Shu lahzalar videooperatorlar tomonidan tasvirga tushirilgan.

4 oktabr kuni kechqurun Ulug‘bekning o‘zi videoni montaj qilib, o‘q uzish tovushlarini qo‘shgan va videoni instagramdagi sahifasiga joylagan. Keyinchalik mazkur videoni internetda tarqatgan. “Zamin”ni Telegramʻda oʻqing!