Ukrainadan qaytgan oʻzbekistonliklar koʻrganlarini soʻzlab berdi

24 fevraldan buyon Rossiya va Ukraina oʻrtasida urush ketmoqda. Harbiy harakatlar olib borilayotgan joylardan koʻplab davlatlar oʻz fuqarolarini evakuatsiya qilishga kirishgan. Jumladan, Oʻzbekiston ham.

28 fevral kuni soat 23:00da Ukrainadan Polshaga evakuatsiya qilingan 251 nafar oʻzbekistonlik Islom Karimov nomidagi Toshkent xalqaro aeroportiga etib keldi. «Daryo» muxbiri aeroportda boʻlib, Ukrainadan kelgan fuqarolar bilan suhbatlashdi.

Ukrainadan kelgan oʻzbekistonlik Egamberdi Temurov portlashlarga guvoh boʻlganini, koʻzi oldida minglab insonlar vafot etganini aytib berdi.

^{Foto: «Daryo»}
«Koʻzimning oldida 2 ming askar halok boʻldi. Ularni koʻrib yigʻladim. Hammasi dahshatli edi. Qattiq qoʻrqdim. Kievda haydovchilik qilayotgandim. Mashinamdan 500 metr uzoqlikdagi harbiy boʻlinma birdaniga portlab ketdi. Agar oʻsha erda boʻlsam, men ham tirik qolmasdim. Oʻzbekistonga kelganimdan xursandman. Ukraina va Polshadagi elchixonalarimiz bizga beminnat xizmat qilishdi. Hammalaridan minnatdormiz», — dedi u.

Yana bir yoʻlovchi Sherzod Boynazarov ham urushga guvoh boʻlganini ta'kidladi.

^{Foto: «Daryo»}
«Kievda bizdan 15 kilometr uzoqlikda bomba portladi. Qattiq qoʻrqdik, hayajon bosdi. Urush boʻldi, otishma boʻldi. Oʻlganlarni ham koʻrdim. 5 kun uxlamadik, juda holdan toyganmiz», — deydi Ukrainadagi voqealar guvohi.

Polsha orqali Oʻzbekistonga kelgan Bahrom Jabborov chegaradagi qiyinchilik haqida gapirdi.

^{Foto: «Daryo»}
«Chegarada juda qiynaldik. 2 sutkalar uxlamadik. Biz Polshaga qarab yoʻlga chiqqanimizdan 1 sutka oʻtib, Kievda qolib ketgan boshqa sheriklarimiz bilan telefon orqali bogʻlandik. Ular shahardan chiqa olishmabdi. ‘Ruslar qamal qilib olishdi’, deyishdi», – dedi u.

Avvalroq, 27 fevral kuni Ukrainadagi Oʻzbekiston fuqarolarining 600 dan ziyodi Polsha chegarasiga etkazilgani xabar qilingandi.
Eslatib oʻtamiz, Oʻzbekiston Tashqi ishlar vazirligi Ukraina hududida 4300 ga yaqin Oʻzbekiston fuqarosi borligini ma'lum qilgandi.

Oʻzbekistonning Ukrainadagi elchixonasi xabariga koʻra, 26 fevral kuni Toshkent vaqti bilan soat 20:30 da 90 dan ziyod Oʻzbekiston fuqarolaridan iborat birinchi evakuatsiya guruhi Lvovdan «Krakovets» nazorat-oʻtkazish punkti yoʻnalishi boʻylab yoʻlga chiqqan.

Keyinroq elchixona mamlakatdagi oʻzbekistonlik fuqarolarni evakuatsiya qilish ishlari haqida qoʻshimcha ma'lumot berdi. Unda aytilishicha, chegarani kesib oʻtish uzoq vaqt oladi, birinchi guruh uchun bu jarayon 14 soat davom etgan.

Elchixona, shuningdek, mamlakatni tark etish uchun Moldovaga ketmoqchi boʻlgan fuqarolarga murojaat bilan chiqdi. Elchixona xavfsizlik tamoyilidan kelib chiqib, fuqarolar uchun Moldovaga borish osonroq boʻlsa, ushbu variantni koʻrib chiqishlari lozim ekanini bildirgan. “Zamin” yangiliklarini “Telegram”da kuzatib boring