O‘zbekistonda shakar va o‘simlik yog‘i narxi oshib ketish sababi ma’lum bo‘ldi

Mart oyida O‘zbekistonda o‘simlik yog‘i va shakar narxlarida o‘sish kuzatildi. Bu haqda Iqtisodiy tadqiqotlar va islohotlar markazi direktori Obid Hakimov ma’lum qildi.

Uning so‘zlariga ko‘ra, o‘z vaqtida ko‘rilgan chora-tadbirlar tufayli muhim bo‘lgan oziq-ovqat mahsulotlarida, masalan, go‘sht, kartoshka kabi mahsulotlar narxi keskin o‘zgarishining oldi olib qolindi.

Hakimovning ta’kidlashicha, hukumat tomonidan muhim rezervlar (masalan, shakar) har bir viloyatlarga yetarli darajada bo‘lib berilgan.

- Lekin ayrim bir mahalliy hokimliklar tomonidan mana shu ajratilgan rezervlarni vaqtida joylarga yetkizib borilmaganligi ajiotajlar paydo bo‘lib, narxlar ko‘tarilishi holatlari kuzatilgan, — dedi Hakimov.

Ajratilgan rezervlarni o‘z vaqtida tarqatish va bozorlardagi narxlarni keskin oshishini oldini olish bo‘yicha alohida ishlar olib borish bo‘yicha topshiriqlari berildi.

- Mahsulotlar va bozorlardagi holatlar tahlil qilib borilyapti va o‘sha bozorlardagi o‘zgarishlarni tezkor ravishda to‘g‘irlash bo‘yicha choralar ko‘rilyapti, — dedi Hakimov.

Uning so‘zlariga ko‘ra, 1 aprel holatiga shakar qoldiqlari 250 ming tonnadan ortiq tashqil qildi. Aholining bug‘doy uni yillik iste’moli 2,5 mln tonna bo‘ladigan bo‘lsa, hozirgi zaxiralarning o‘zi 1 mln tonnaga yaqin.

Bundan tashqari 500 mlrd so‘mlik imtiyozli kreditlar kerakli oziq-ovqat mahsulotlarining importi uchun berilgan. Bu kreditlar muddati yana uzaytirildi. “Zamin” yangiliklarini “Telegram”da kuzatib boring