Li Jon Je “Kalmar o‘yini” uchun 10 kiloga ozdi

Janubiy Koreya seriali — “Kalmar o‘yini”ning yakunlovchi mavsumi Netflix platformasida namoyish etilishi bilan yana bir bor global e’tibor markaziga chiqdi. Millionlab tomoshabinlar intiqlik bilan kutgan final nafaqat syujet keskinligi, balki aktyorlar fidoyiligi bilan ham ajralib turdi.

Ushbu serialda bosh qahramon Son Gi Xun obrazini yaratgan mashhur aktyor Li Jon Je o‘z rolini haqqoniyroq chiqarish uchun jismoniy va ruhiy tomondan katta tayyorgarlik ko‘rdi. Aktyorning aytishicha, u qariyb 14 oy davomida qattiq parhez tutib, ikki oy ichida 10 kilogramm vazn yo‘qotgan.

“Oxirgi ikki oyda juda qattiq diyetaga amal qildim. Bu faqat tashqi ko‘rinish uchun emas, balki Gi Xunning charchagan, ruhan yiqilgan holatini tomoshabinlar ekran orqali his qilsin degan niyatda qilindi”, — deydi Li Jon Je.

Uning sa’y-harakatlari serial finalida o‘z ifodasini topdi — mazkur sahna tomoshabinlarda kuchli taassurot qoldirgan. Ta’kidlash joizki, bu muhim epizodni suratga olish uchun butun ijodiy guruhga faqat bitta dubl imkoni berilgan, shu bois barcha yuksak mas’uliyat bilan ishlagan.

Shu bilan birga, serialning kelajagi haqida turli taxminlar paydo bo‘lmoqda. Internetda tarqalayotgan mish-mishlarga ko‘ra, “Kalmar o‘yini”ning yangi spin-off qismi tayyorlanishi mumkin. Netflix 2024 yil boshida bu borada rasman bildiruv bergan — bu esa serialning yangi talqini boshqa mamlakatda, yangi qahramonlar bilan suratga olinishi ehtimolini kuchaytiradi.

Hozirda antiutopiya va ijtimoiy dramalarga bo‘lgan qiziqish ortib borayotganini hisobga olsak, “Kalmar o‘yini” brendi aniqki, yaqin yillarda ham Netflix'ning eng mashhur franshizalaridan biri bo‘lib qolishi mumkin. Loyiha nafaqat tomoshabin, balki mutaxassislar orasida ham qizg‘in muhokama qilinishda davom etmoqda. “Zamin”ni Telegramʻda oʻqing!