O‘zbek estradasining mashhur vakili Ozoda Nursaidova o‘zining Instagram sahifasida muxlislarini xursand qiladigan yangi video bilan bo‘lishdi. Unda xonandaning daraxt ekayotgani aks etgan.
Ma’lum bo‘lishicha, xonanda Farg‘ona viloyatining Uchko‘prik tumaniga tashrif buyurgan. Bahor fasli munosabati bilan yurtimizda o‘tkazilayotgan hashar tadbirlarida u ham faol ishtirok etib, tabiatni asrashga o‘z hissasini qo‘shish maqsadida daraxt ekdi.
Ozoda Nursaidova barcha yurtdoshlarni yaqinlashib kelayotgan bayram bilan samimiy tabriklab, atrof-muhitga befarq bo‘lmaslikka chaqirdi. U hech bo‘lmaganda har bir inson bittadan daraxt ekib, tabiatni asrashga hissa qo‘shishi kerakligini ta’kidladi.
Xonanda video ostida hazil aralash yozuv ham qoldirgan: “Uchko‘priklilar, ekkan daraxtimga qarab turinglar”.
Qisqa fursatda ushbu video muxlislar tomonidan iliq kutib olindi. Obunachilar xonandaning bu tashabbusini yuqori baholab, unga minnatdorlik bildirgan holda bunday ezgu ishlar boshqalarga ham o‘rnak bo‘lishini ta’kidlashdi.
