O‘zbekistonda madaniyat va sanʼat sohasini chuqur isloh qilish, uni yangi bosqichga olib chiqishga qaratilgan keng qamrovli ochiq muloqotlar mavsumi boshlanmoqda. Prezident topshirig‘i asosida tashkil etilayotgan ushbu uchrashuvlar soha vakillari, ijodkorlar hamda tadbirkorlarni bir maydonga jamlaydi.
Tadbirlar O‘zbekiston Respublikasi Prezidenti Administratsiyasi va Madaniyat vazirligi rahbariyati ishtirokida o‘tkaziladi. Shu bilan birga, vazir Ozodbek Nazarbekov ham mazkur muloqotlarda faol ishtirok etishi belgilangan.
Rejaga ko‘ra, uchrashuvlar 2026 yil 20–25 aprel kunlari alohida tasdiqlangan grafik asosida tashkil etiladi. Asosiy maqsad — sohadagi mavjud muammolarni ochiq muhokama qilish va ularga amaliy yechimlar ishlab chiqish.
Ochiq muloqotlar bir qator yo‘nalishlarni qamrab oladi. Jumladan, kino va animatsiya, teatr va sirk sanʼati, adabiyot va ijodiy faoliyat, musiqa hamda raqs sohalari alohida ko‘rib chiqiladi. Shuningdek, hunarmandchilik, muzeylar faoliyati, arxeologiya hamda bolalar uchun kontent yaratish masalalari ham muhokama markazida bo‘ladi.
Muloqotlarda ishtirok etish istagida bo‘lgan fuqarolar maxsus @mvochiqmuloqotbot boti orqali ro‘yxatdan o‘tishi mumkin. Ro‘yxatdan o‘tgan ishtirokchilar tasdiqlangan jadval asosida uchrashuvlarda qatnashish imkoniga ega bo‘ladi.
Mazkur tashabbus mamlakat madaniyatida yangi islohotlar bosqichini boshlab berishi kutilmoqda.
“Zamin”ni Telegramʻda oʻqing!
