Nukus, Buxoro, Fargʻona va Namangan texnika universitetlari tashkil etiladi

^{Foto: Prezident matbuot xizmati}
Prezident Shavkat Mirziyoyev 22 yanvar kuni oliy ta'lim va ilm-fan sohasidagi ustuvor vazifalarga oid taqdimot bilan tanishdi. Bu haqda Prezident matbuot xizmati xabar berdi.

Mamlakat taraqqiyotining tayanchi sifatida bu yoʻnalishlarga katta e'tibor qaratilmoqda. Yangi oliygohlar ochilib, qamrov ancha kengaydi. Ta'lim jarayonlari sifat jihatidan yaxshilanmoqda.

Oʻtgan yili bakalavriat yoʻnalishlari maqbullashtirilib, 1 200 dan ortiq ta'lim dasturlari xorijiy andozalarga moslashtirildi. Jumladan, bitiruvchilarga malaka talabi toʻliq yangilandi, qayta tiklanuvchi energiya manbalari, atrof-muhit muhandisligi, biotizimlar muhandisligi kabi zamonaviy yoʻnalishlar ochildi.

Bu yil ham qator muhim vazifalar belgilangan. Xususan, yana mingdan ortiq ta'lim dasturlari “Top-300” universitet dasturlari asosida takomillashtiriladi. 45 ta ta'lim dasturlari xalqaro akkreditatsiyadan oʻtkaziladi. Oliygohlarda Registrator ofisi xizmatlari bilan talabalar toʻliq qamrab olinadi. Dual ta'limga yana 50 ming talaba jalb qilinadi.

Oliy ta'limda ilmiy salohiyatni 55 foizga chiqarish, xorijda 5 ming nafar pedagog malakasini oshirish rejalashtirilgan. Ilgʻor muhandislik maktablarini 25 taga etkazib, sanoat korxonalari bilan loyihalar qiymatini 10 barobar oshirish maqsad qilingan.

Taqdimotda mutasaddilar shu borada amalga oshiriladigan ishlar haqida axborot berdi.

^{Foto: Prezident matbuot xizmati}
Ma'lumki, oliy ta'limga qabul jarayonida “avval test, keyin tanlov” tamoyiliga oʻtildi. Davlat granti talabalarning iqtidoriga qarab ajratiladigan boʻldi. Moliyaviy mustaqillik berilgan 40 ta oliygohda Registrator ofisi tashkil qilindi. Natijada dekanat va boʻlimlarda shtatlar 20 foizga qisqarib, 30 ta xizmat turi raqamlashdi.

Ushbu tajribadan kelib chiqib, shunday ofislarni boshqa oliy oʻquv yurtlarida ham ochish, ta'lim va ilm-fan xizmatlarini qamrab olgan yagona raqamli tizim joriy etish boʻyicha koʻrsatmalar berildi.

Amaliyot bilan uygʻunlikni kuchaytirish maqsadida dual ta'lim yoʻlga qoʻyilmoqda. Hozirda 15 ming talaba 957 ta korxonaga biriktirilgan. Lekin korxonalarda bunga qiziqish kam. Shu bois dual ta'limda ishtirok etayotgan korxonalarni ragʻbatlantirish boʻyicha takliflar bildirildi.

2024 yil 20 iyunda boʻlib oʻtgan videoselektor yigʻilishida davlatimiz rahbari har bir hududda texnika oliygohi va ilgʻor muhandislik maktablari tashkil qilish vazifasini qoʻygan edi. Hozirgacha Termiz, Andijon va Qarshida texnika universitetlari tashkil boʻldi. Shuningdek, 8 ta muhandislik maktabi ochildi.

^{Foto: Prezident matbuot xizmati}
Yigʻilishda Nukus, Buxoro, Fargʻona va Namangan texnika universitetlarini tashkil etish loyihalari taqdimot qilindi. Unga koʻra, yangi yoʻnalishlar ochilib, xorijiy dasturlar tatbiq qilinadi, talabalarning ilmiy-innovatsion jarayonlarda ishtiroki kengaytiriladi, oliygohlarga sanoat hamkorlari biriktiriladi.

Umuman, bu yoʻnalishdagi 35 ta muassasani yiriklashtirish hisobiga, 22 ta texnika universiteti tashkil qilinadi. Shu yil oxirigacha yana 17 ta muhandislik maktabi ochiladi.

Soʻnggi yillarda oliy oʻquv yurtlarida ilmiy salohiyat 41 foizdan 45 foizga oshgan. Lekin, aksariyat ilmiy tadqiqotlar sanoat va ishlab chiqarishdagi zamonaviy tendentsiyalarni qamrab olmayapti.

Shu bois doktorantura kvotasini taqsimlashda iqtisodiyotning drayver sohalariga ahamiyat qaratish, ilmiy daraja va unvonlar olish tartibini takomillashtirish boʻyicha koʻrsatmalar berildi. Pedagoglar kasbiy mahoratini oshirishni yangi bosqichga olib chiqish zarurligi ta'kidlandi.

Yoshlar tarbiyasida axloq va sport ham muhim. Bu borada “Besh tashabbus”, “Ma'rifat ulashib”, “Talabalar sport ligasi”, “Zakovat” kabi harakatlar yoʻlga qoʻyilgan. Bunday ma'naviy-ma'rifiy, sport va intellektual loyihalar bilan talabalarni toʻliq qamrab olish, yoshlarda vatanparvarlik ruhini kuchaytirish tadbirlari yuzasidan axborot berildi. “Zamin” yangiliklarini “Telegram”da kuzatib boring