O‘zbekistonda pensiya va nafaqalar yana oshadi: kimlarga qancha?

O‘zbekiston prezidenti Shavkat Mirziyoyev tomonidan imzolangan yangi farmon bilan, mamlakatimizda 2025 yilning 1 iyulidan boshlab pensiyalar, nafaqalar, shuningdek, bolalarga nafaqalar va kam ta’minlangan oilalar uchun moddiy yordam miqdori sezilarli darajada oshiriladigan bo‘ldi.

Hukumat tomonidan tasdiqlangan mazkur farmonda qayd etilishicha, 2025 yilning 1 iyulidan boshlab yoshga doir eng kam pensiya miqdori 918 ming so‘m etib belgilandi. Bu ko‘rsatkich avvalgiga nisbatan 10 foizga yuqori hisoblanadi. Shuningdek, nogironlik bo‘yicha tayinlangan eng kam pensiya miqdori 1 mln 12 ming so‘mga yetkaziladi.

Farmonda kam ta’minlangan oilalar uchun har oylik bolalar nafaqalari miqdori ham aniq belgilab berilgan. Endilikda 3 yoshgacha bo‘lgan har bir bola uchun oyiga 360 ming so‘m, 3 yoshdan 18 yoshgacha bo‘lgan bitta farzand uchun oyiga 275 ming so‘m nafaqa to‘lanadi. Shu bilan birga, oiladagi ikkinchi bolaga qo‘shimcha sifatida 165 ming so‘m, uchinchi va undan keyingi har bir farzand uchun esa 110 ming so‘m to‘lanadi.

Kam ta’minlangan oilalarga ajratiladigan moddiy yordamning oylik miqdori ham 420 ming so‘mgacha oshiriladi. Mazkur o‘zgarishlar aholining ijtimoiy himoyasini yanada mustahkamlash va ularning turmush darajasini oshirish maqsadida amalga oshirilmoqda.

Bundan tashqari, 2025 yil 1 avgustdan boshlab budjet tashkilotlari xodimlarining oylik ish haqlari hamda stipendiyalari ham 10 foizga oshiriladi. Ushbu sanada bazaviy hisoblash miqdori (BHM) 412 ming so‘m deb belgilanib, mehnatga haq to‘lashning eng kam miqdori esa 1 mln 271 ming so‘mni tashkil qiladi.

Hukumat tomonidan tasdiqlangan farmonga ko‘ra, ish haqlari, pensiyalar va nafaqalarni oshirish bilan bog‘liq xarajatlar Davlat budjeti va Iqtisodiyot va moliya vazirligi huzuridagi Pensiya jamg‘armasining mablag‘lari hisobidan amalga oshiriladi.

Farmonda, shuningdek, xususiy sektorda mehnat faoliyati olib borayotgan fuqarolarning to‘lov qobiliyatini oshirish maqsadida ish beruvchilarga tavsiyalar ham berilgan. Ularga o‘z xodimlariga oylik ish haqini mehnatga haq to‘lashning eng kam miqdoridan kam bo‘lmagan darajada belgilash tavsiya etiladi.

Shuni ta’kidlash kerakki, O‘zbekistonda aholining ijtimoiy-iqtisodiy ahvolini yaxshilash borasidagi sa’y-harakatlar izchillik bilan davom etmoqda. Oxirgi marta mamlakatda ish haqlari, pensiya va nafaqalar 2024 yilning 1 sentyabrida 15 foizga oshirilgan edi.

Hukumatning yangi farmoni bu safar ham aholining ijtimoiy himoyasini ta’minlash hamda turmush farovonligini yanada yaxshilashga xizmat qiladi. Buning natijasida ko‘plab oilalarda iqtisodiy barqarorlik yanada mustahkamlanib, kundalik hayot sifatining yaxshilanishi kutilmoqda. “Zamin”ni Telegramʻda oʻqing!