Hojilarimizning Vatanga qaytishi boshlandi: to‘g‘ridan to‘g‘ri parvozlar amalga oshiriladi

Joriy yilning 12-iyun sanasidan boshlab muborak safar — Haj ibodatini ado etib kelgan yurtdoshlarimiz Saudiya Arabistonidan ona Vatanga qaytib kelishni boshlaydilar. Bu haqda O‘zbekiston musulmonlari idorasi Matbuot xizmati rasman ma’lum qildi.

Ma’lum qilinishicha, hojilarimiz Jidda xalqaro aeroportidan yurtimizning turli mintaqalarida joylashgan 10 shahar — Toshkent, Buxoro, Namangan, Farg‘ona, Samarqand, Qarshi, Termiz, Urganch, Navoiy va Nukusga to‘g‘ridan to‘g‘ri aviaqatnovlar orqali qaytib kelishadi.

Tashish ishlariga “Uzbekistan Airways” milliy aviakompaniyasining zamonaviy va qulay samolyotlari jalb etilgan. Parvozlar tajribali uchuvchilar hamda malakali bort kuzatuvchilari hamrohligida xavfsiz va farovon amalga oshiriladi.

Har yili minglab musulmonlarimiz uchun Haj safari yurakdan kutilgan va hayotda bir bor nasib etuvchi katta ne’mat hisoblanadi. Haj ibodati mukammal amalga oshirilgandan so‘ng, yurtdoshlarimizning salomatligi va xavfsizligini ta’minlagan holda yurtimizga qaytarilishi mas'ul idoralar uchun ustuvor vazifalardan biri bo‘lib qolmoqda.

Eslatib o‘tamiz, bu yilgi haj mavsumi jahon miqyosida ham katta tashkilotchilik bilan o‘tmoqda. O‘zbekistonlik hojilarning ziyorati davomida ular uchun barcha shart-sharoitlar yaratilib, tibbiy xizmatdan tortib to transport va oziq-ovqat ta’minotigacha yuqori darajada ta’minlangan.

Yurtdoshlarimizning xayrli va osoyishta qaytayotganligi barchamiz uchun quvonarli holdir. Ular yurtimizga omon-eson qaytib kelishlari bilan yaqinlariga, mahallasi va jamoasiga ruhiy tayanch, ma’naviy kuch olib keladilar.