28 iyul kuni Prezident Shavkat Mirziyoyevga Andijon viloyatida amalga oshirilayotgan islohotlar natijadorligi va yaqin kelajakdagi rejalar haqida batafsil axborot berildi, deb xabar berdi president.uz. O‘zbekiston Prezidentining 2024 yil 18 noyabrdagi qaroriga muvofiq, viloyatda ijtimoiy-iqtisodiy taraqqiyot, investitsiya va tadbirkorlik muhitini yaxshilashga alohida e’tibor qaratilmoqda.
Joriy yilda Andijonga 3,1 milliard dollar investitsiya jalb etish, 1,5 milliard dollarlik eksportga erishish, 305 ming nafar fuqaroning bandligini ta’minlash, 32 mingdan ziyod oilani kambag‘allikdan chiqarish kabi katta maqsadlar belgilab qo‘yilgan. Yil boshidan buyon 1 milliard dollarlik yangi ishlab chiqarish quvvatlari, 344 ta savdo va servis markazi ishga tushgan, yana 2,5 milliard dollarlik loyihalar boshlandi.
O‘tgan olti oyda 850 million dollar investitsiya kiritildi, eksport hajmi esa 465 million dollarni tashkil qildi. Aprel oyida davlat rahbarining viloyatga tashrifi va unda belgilangan yangi vazifalar Andijonning o‘sishiga yanada kuchli turtki berdi.
Yaqinda ilmiy ekspertlar va faol tadbirkorlar ishtirokida "Islohotlar shtabi" tashkil etildi. Bu shtab tomonidan iqtisodiy va ijtimoiy sohalarga oid yangi takliflar ishlab chiqildi va hozirgi taqdimotda ularning asosiy yo‘nalishlari va samarasi haqida axborot berildi.
Misol uchun, 40 million dollarlik investitsiya orqali Germaniya, Turkiya va Yaponiyadan olib kelinadigan robot-texnologiyalar asosida innovatsion klinika tashkil etish, Italiyadan 20 million yevro sarmoya orqali agroklaster, Germaniyadan 25 million yevro jalb etish orqali zamonaviy agrologistika majmuasi barpo etish rejalashtirilgan. Shuningdek, Xonobod shahri, Xo‘jaobod va Buloqboshida turistik maskanlar tashkil etish bo‘yicha 30 dan ziyod yangi tashabbuslar bildirilgan.
Jami 1 milliard 100 million dollarlik qo‘shimcha loyihalar shakllantirilib, ular natijasida 22 ming yangi ish o‘rni, 200 million dollarlik qo‘shimcha eksport imkoniyati ochiladi. Prezident har bir shahar va tumanga individual yondashuvni, loyihalarni investitsiya kam hududlarga taqsimlashni, ishsiz va ehtiyojmand oilalarni o‘qitish va ishga joylashtirish, mahallalarni jinoyatchilikdan xoli hududga aylantirishga alohida ko‘rsatmalar berdi.
Andijonning iqtisodiy salohiyati yanada kengaymoqda, yangi investitsiya va rivoj yo‘llari esa aholining turmush sifati va viloyatning nufuzini yangi bosqichga olib chiqishi kutilmoqda.
