Kuvaytning Dejavu for Juice kompaniyasi rahbari Ahmad al-Bagʻiliy Xorazm viloyatida oʻtkazilgan biznes-forum hamda «Qovun sayli» xalqaro festivalida ishtirok etdi. Ushbu tashrif doirasida mehmon mahalliy ishbilarmonlar bilan muloqot qilib, hamkorlikning amaliy yoʻnalishlarini muhokama etdi.
Kuvayt vakili «Qovun sayli» festivali haqida toʻxtalar ekan, koʻplab xalqaro tadbirlarda qatnashganini, biroq aynan koʻhna Xorazm zaminida tashkil etilgan ushbu festival oʻziga xos jozibadorlik va ruh bilan ajralib turajagini taʼkidladi. Uning qayd etishicha, madaniy anʼana, mahalliy pazandachilik va mehmondoʻstlik uygʻunligi tadbirni noyob qiladi.
Biznes-forum doirasida kuvaytlik tadbirkor oʻzbek ishbilarmon doiralari bilan B2B formatda uchrashuvlar oʻtkazdi. Suhbatlarda oʻzaro hamkorlikning istiqbolli yoʻnalishlari — qayta ishlangan oziq-ovqat, ichimliklar sanoati, savdo tarmoqlari va logistika boʻyicha takliflar almashildi. Safar chogʻida, shuningdek, Xorazmdagi Japan Uz Trade House va Khorezm Insulation Group kompaniyalari vakillari bilan ham alohida muzokaralar tashkil etildi.
Uchrashuvlar mazmunida, avvalo, Oʻzbekistondan quruq va quritilgan mevalarni Kuvaytga eksport qilish masalasi atroflicha koʻrib chiqildi. Tomonlar qulay transport-logistika yoʻnalishlarini belgilash, yetkazib berish muddatlari va sifat standartlarini muvofiqlashtirish, sertifikatlash va bojxona rasmiyatlarini optimallashtirish boʻyicha ishchi guruhlar tuzish tashabbusini muhokama qildi.
Qisqasi, Xorazmdagi biznes-forum va «Qovun sayli» xalqaro festivali Kuvayt bilan savdo-iqtisodiy aloqalarni yangi bosqichga olib chiqish uchun qulay minbar boʻldi: ehtiyoj va takliflar aniqlandi, hamkorlikning amaliy qadamlari belgilandi, eksport logistikali bo‘yicha dastlabki kelishuvlar muhokama etildi. Endi esa navbat — kelishuvlarni aniq loyihalarga aylantirish va qoʻshma tashabbuslarni amalga oshirishga.
Foto: Dunyo
“Zamin”ni Telegramʻda oʻqing!
