O‘zbekiston bolalarga nisbatan har qanday zo‘ravonlik va tahdidlarga barham berish bo‘yicha tashkil etilgan global alyansga rasman qo‘shildi. Bu haqda UNICEFning O‘zbekistondagi vakolatxonasi rasmiy xabar berdi.
UNICEF bayonotida ta’kidlanishicha, ushbu qadam bolalarni himoya qilish yo‘lidagi muhim va strategik harakat sifatida baholanmoqda. “Biz O‘zbekiston hukumati bilan hamkorlikda, birgalikda harakat qilishdan katta faxr his qilamiz. Har bir bola uyda, maktabda va jamiyatda xavfsiz va mustahkam muhitda o‘sishi uchun barcha sa’y-harakatlarni birlashtiramiz”, — deyiladi xabarda.
Global alyansga qo‘shilish O‘zbekistonning bolalar huquqlarini himoya qilishdagi oldingi yo‘nalishlarini yanada mustahkamlaydi. Ushbu tashabbus orqali davlat bolalarning ta’lim olishi, sog‘lig‘i va jamiyatda xavfsiz muhitda ulg‘ayishi uchun keng qamrovli chora-tadbirlarni amalga oshirishi mumkin.
Hukumat va UNICEFning hamkorligi nafaqat maktab va uy muhitini, balki jamoatchilik va ijtimoiy muhitda ham bolalarni zo‘ravonlikdan muhofaza qilishni ta’minlaydi. Bu qadam, shuningdek, ota-onalar, ta’lim muassasalari va mahalliy jamiyatlarni bolalarni himoya qilish yo‘lida faol va mas’uliyatli bo‘lishga undaydi.
“Zamin”ni Telegramʻda oʻqing!
