2026-yil O‘zbekistonda yoshlarni kasb-hunar va zamonaviy malakalarga o‘rgatish yili bo‘lishi belgilandi. 15-sentyabr kuni Prezident Shavkat Mirziyoyev Toshkent viloyati Bo‘stonliq tumanida o‘qituvchi va murabbiylar bilan muloqot chog‘ida bu muhim tashabbusni e’lon qildi.
Davlat rahbari yoshlarning faqat nazariy bilim bilan cheklanmasdan, kasbiy ko‘nikmalarni mukammal o‘zlashtirishi va xorijiy tillarni egallashi muhimligini ta’kidladi.
Ma’lumotlarga ko‘ra, mamlakat iqtisodiyotiga yiliga 30–35 milliard dollar miqdorida investitsiyalar jalb etiladi, minglab yangi korxonalar tashkil etiladi va faoliyat boshlaydi. Natijada, har yili 250–300 ming yuqori daromadli ish o‘rinlari yaratilishi rejalashtirilmoqda. Yoshlar ushbu imkoniyatlardan samarali foydalanishi uchun Kasbiy ta’lim agentligi tashkil etiladi va mamlakatdagi 598 ta texnikumda xalqaro standartlar joriy qilinadi.
Kelgusi bir yil ichida Germaniya, Shveysariya, Koreya, Xitoy va Britaniya kabi ilg‘or davlatlarning zamonaviy ta’lim dasturlari 100 ta texnikumda yo‘lga qo‘yiladi. Shuningdek, istalgan talabgor talabalar texnikumlarda xalqaro malaka imtihonlarini topshirib, xalqaro sertifikatga ega bo‘lish imkoniyatiga ega bo‘ladi. Hozirda Angliyaning “Pirson” kompaniyasi bilan hamkorlikda 14 ta texnikumda “BITEK” dasturi faoliyat boshladi.
Prezident muloqotida dual ta’lim qamrovi 5 baravar kengaytirilishi, texnikumlarda xorijiy tillar dars soatlari 4 marta oshirilishi, hamkor korxonalar uchun 5 milliard so‘mgacha imtiyozli kreditlar ajratilishi va 2026-yildan texnikum bitiruvchilari haqidagi ma’lumotlarni o‘z ichiga olgan raqamli platforma ishga tushirilishi ta’kidlandi. Bu chora-tadbirlar yoshlarning kasbiy tayyorgarligi va mehnat bozoriga tayyorligi darajasini sezilarli oshirib, ularning kelajakdagi samarali va miqdorli faoliyati uchun barqaror asos yaratadi.
2026-yil yoshlar uchun yangi imkoniyatlar yili sifatida tarixda qayd etilishi aniq. Endi har bir bitiruvchi o‘z istak va qobiliyatiga qarab zamonaviy bilim va kasbiy ko‘nikmalarni egallaydi, bu esa mamlakat iqtisodiyotining rivojlanishi va yoshlar faoliyatining samaradorligini ancha oshiradi.
“Zamin”ni Telegramʻda oʻqing!
