Joriy yil sentyabr oyida AQSH dollarining qiymati pasayishi va yangi o‘quv yilining boshlanishi Toshkentdagi uy-joy ijara narxlariga sezilarli ta’sir ko‘rsatdi. Bu haqda Makroiqtisodiy va hududiy tadqiqotlar instituti tahlilida ma’lum qilindi.
Mutaxassislar fikricha, so‘mning dollarga nisbatan mustahkamlanishi natijasida ijara narxlarining milliy valyutadagi ko‘rinishi o‘zgargan. Dollarda hisoblangan ijara narxlari esa aksincha, o‘sishga moyil bo‘lgan. Bu holat ijara bozoridagi muvozanatni qisman o‘zgartirdi.
Shuningdek, sentyabrda yangi o‘quv yili boshlangani ham ijara narxlariga ta’sir etgan. Talabalarning poytaxtga qaytishi va uy-joyga bo‘lgan talab oshishi natijasida ijaraga beruvchilar narxni ko‘tarishni boshlagan.
O‘rtacha ta’mirlangan uy-joylar narxida o‘sish kuzatildi
Sentyabr oyida o‘rtacha ta’mirlangan xonadonlar ijarasi quyidagicha o‘sdi:
1 xonali — 318 dollardan 334 dollarga (+16 dollar);
2 xonali — 394 dollardan 412 dollarga (+18 dollar);
3 xonali — 477 dollardan 502 dollarga (+25 dollar);
4 xonali — 537 dollardan 556 dollarga (+19 dollar).
Narx jihatidan eng arzon tumanlar qatorida Sergeli va Uchtepa qayd etilgan. Sergelida 1 xonali uylar 293 dollardan boshlansa, Uchtepada — 316 dollardan.
Eng qimmat ijara uylari esa Shayxontohur va Yakkasaroy tumanlarida. Yakkasaroyda 4 xonali uylar narxi 800 dollarga yetgan.
To‘liq ta’mirlangan uy-joylar yanada qimmatladi
To‘liq ta’mirlangan kvartiralar ijarasidagi o‘sish yanada sezilarli bo‘ldi:
1 xonali — 413 dollardan 435 dollarga (+22 dollar);
2 xonali — 580 dollardan 614 dollarga (+34 dollar);
3 xonali — 824 dollardan 874 dollarga (+50 dollar);
4 xonali — 1185 dollardan 1201 dollarga (+16 dollar).
Eng arzon uylar Sergeli va Uchtepada saqlanib qolgan bo‘lsa, Mirobod va Shayxontohurda narxlar keskin yuqori. Mirobodda 4 xonali uylar 1462 dollargacha yetgan.
Ijara bozoridagi umumiy tendensiya
Tahlilchilarning ta’kidlashicha, valyutalar kursining o‘zgarishi, talabning mavsumiy oshishi va uy-joy tanqisligi Toshkent ijara bozorining asosiy harakatlantiruvchi omillaridir.
Shu bilan birga, ijara narxlarining o‘sishi talab va taklif muvozanati bilan bog‘liq bo‘lib, ayniqsa, yangi o‘quv yili boshlanishida talab keskin oshib, bozorda narxlarni yuqori darajada ushlab turmoqda.
“Zamin”ni Telegramʻda oʻqing!
