Favqulodda vaziyatlarda harakat qilish tizimi yanada takomillashtirilmoqda. Prezident qarori bilan “Favqulodda vaziyatlar vazirligi to‘g‘risida”gi yangi nizom tasdiqlandi, deb xabar berdi Prezident.uz. Ushbu hujjat vazirlikning maqomi, vazifalari, huquqlari va faoliyatini amalga oshirish tartibini aniq belgilab berdi.
Yangi nizomga ko‘ra, Favqulodda vaziyatlar vazirligi endilikda nafaqat yong‘inlar yoki tabiiy ofatlar paytida faol harakat qiluvchi idora, balki oldini olish ishlarini tizimli ravishda yo‘lga qo‘yuvchi markaziy tuzilma sifatida faoliyat yuritadi. Uning asosiy yo‘nalishlari aholini xavf-xatardan himoya qilish, favqulodda holatlar xavfini kamaytirish va tezkor javob choralarini ta’minlashga qaratilgan.
Vazirlik oldida turgan vazifalar qatorida quyidagilar bor: tabiiy va texnogen ofatlarning oldini olish bo‘yicha kompleks choralar ko‘rish, mavjud kuch va vositalarni doimo tayyor holda ushlab turish, hamda fuqaro muhofazasi tizimini rivojlantirish. Shu bilan birga, aholini favqulodda vaziyatlar haqida o‘z vaqtida xabardor qilish ham muhim yo‘nalish sifatida belgilandi.
Bundan tashqari, yonish yoki portlash xavfi yuqori bo‘lgan kimyoviy moddalar bilan ishlovchi korxonalarda xavfsizlik qoidalariga qat’iy rioya etilishi ustidan nazorat kuchaytiriladi. Vazirlik mazkur faoliyatlarni muvofiqlashtirib, standartlarga mosligini ta’minlaydi.
Yangi nizom asosida Favqulodda vaziyatlar vazirligi shaxsiy tarkibi uchun maxsus kiyim-bosh va ramzlar tasdiqlandi. Ular prezident tomonidan ma’qullangan namuna asosida tayyorlanadi. Harbiy xizmatchilar va qutqaruvchilar endi davlat hisobidan bepul harbiy va maxsus forma bilan ta’minlanadi.
Bu qaror nafaqat tizimni modernizatsiya qilish, balki qutqaruvchilarning nufuzini oshirish, ularning mehnatini munosib qadrlashga ham xizmat qiladi. Yangi nizom orqali favqulodda holatlarga qarshi kurashish tizimi zamonaviy va samarali yo‘lga qo‘yilishi kutilmoqda.
“Zamin”ni Telegramʻda oʻqing!
