O‘zbekistonda farmatsevtika sohasida keng qamrovli islohotlar amalga oshirilmoqda. Bu islohotlarning asosiy maqsadi dori vositalarini import qilishni soddalashtirish va davlat ro‘yxatidan o‘tkazish muddatlarini sezilarli darajada qisqartirishdir.
Prezident Shavkat Mirziyoyevga taqdim qilingan mazkur yangiliklar sifatli dori vositalarining aholiga yetkazib berilishini yaxshilash hamda milliy tizimni xalqaro standartlarga moslashtirishga qaratilgan. Islohotlar markazida texnologiyalar transferi mexanizmi yotadi.
Ushbu mexanizm xorijiy farmatsevtika kompaniyalariga O‘zbekistonda ishlab chiqarishni yo‘lga qo‘yish va keyinchalik ularni tezkor ro‘yxatdan o‘tkazish imkonini beradi. Bu ichki bozordagi dori vositalari ta'minotini oshirish va eksport salohiyatini mustahkamlashga xizmat qiladi.
Generik dorilar bilan bog‘liq tartiblar ham sezilarli darajada o‘zgaradi. Ularning klinik sinovlari endilikda xalqaro standartlarga muvofiq o‘tkaziladi, bu esa ularning bozorga tezkor chiqishini ta’minlaydi.
Shuningdek, ilg‘or biotexnologik hujayra preparatlarini amaliyotga joriy etish uchun sharoitlar yaratilmoqda. Farmatsevtika mahsulotlari xavfsizligi markazi direktori Alisher Temirovning so‘zlariga ko‘ra, xavfsizlikning to‘rt kategoriyasi bo‘yicha differensial ro‘yxatdan o‘tkazish tizimi joriy etilgan.
Bu eng xavfsiz kategoriyadagi arizalarni ko‘rib chiqish muddatini 150 kundan 60 kunga, ikkinchi kategoriya uchun 90 kunga, nisbatan xavfli kategoriyalar uchun esa 120 kunga qisqartirdi. Bundan tashqari, birinchi xavfsizlik sinfidagi tibbiy mahsulotlar (steril va invaziv bo‘lmaganlar) laboratoriya va klinik sinovlardan ozod qilindi.
Ushbu chora-tadbirlar aholining xavfsiz dori vositalari bilan ta’minlanishi va sertifikatlangan mahsulotlarni import qilishni soddalashtirishga qaratilgan. Yangi original dori vositasini ishlab chiqish va bozorga chiqarish jarayoni 10 yildan 15 yilgacha davom etishi va 2 milliard dollardan ko‘proq xarajat talab qilishi mumkin.
Shuning uchun innovatsion dori vositalari generik dorilarga qaraganda ancha qimmat bo‘ladi.
