Prezident qaroriga ko‘ra, davlat tibbiyot muassasalarida kamida 15 yil ish stajiga ega bo‘lgan tibbiyot va farmatsevtika xodimlari uy-joy bilan ta’minlash bo‘yicha yangi imtiyozlarga ega bo‘ladi. Endilikda har yili 500 nafar xodim ipoteka krediti asosida sotib olinadigan uy-joyning dastlabki badal to‘lovining 25 foizi qoplab beriladi.
Ushbu tashabbus 2026-yil 1-yanvardan boshlab Tibbiyot muassasalarining moddiy rag‘batlantirish va rivojlantirish jamg‘armasi mablag‘lari hisobidan amalga oshiriladi. Shu tariqa, ko‘p yillik mehnat va fidoyilikka ega bo‘lgan xodimlar uchun uy-joy xarid qilish jarayoni sezilarli darajada yengillashtiriladi.
Rasmiy manbalarga ko‘ra, bu dastur orqali nafaqat xodimlarning turar-joy sharoiti yaxshilanadi, balki tibbiyot va farmatsevtika sohasidagi malakali kadrlarni rag‘batlantirish va ularni uzoq muddatga ushlab qolish imkoniyati ham oshadi.
Mutasaddilar xabar berishicha, dasturning moliyaviy ta’minoti va ijrosi to‘liq nazorat qilinadi, va manfaatdor xodimlar ushbu imtiyozdan o‘z vaqtida foydalanishlari uchun barcha zaruriy hujjatlar tartibga solinadi.
“Zamin”ni Telegramʻda oʻqing!
