O‘zbekistonda fuqarolarning oilaviy tarixi va avlodlar zanjirini aniqlash bo‘yicha imkoniyatlar yanada kengaymoqda. Prezident farmoniga muvofiq, 2026-yil 1-sentyabrdan mamlakatda «Shajara» axborot tizimi to‘liq ishga tushiriladi. Ushbu yangi platforma fuqarolarga o‘z shajarasini elektron tarzda shakllantirish, tarixiy manbalar va ilmiy ma’lumotlarga suyangan holda aniq va to‘liq avlodlar tarmog‘ini ko‘rish imkonini beradi.
Tizimning asosiy maqsadi — odamlar өz avlodlari haqidagi ma’lumotlarni tartibli, ishonchli va qulay elektron manba orqali olishini ta’minlash. «Shajara» axborot tizimi tarixiy arxivlar, oilaviy hujjatlar va zamonaviy DNK ma’lumotlarini birlashtirgan holda fuqarolarga keng qamrovli xizmat ko‘rsatadi.
Prezident farmonida ta’kidlanishicha, yangi servis orqali quyidagi imkoniyatlar yaratiladi:
- FHDYOning yagona elektron arxivi, davlat arxivlari va idoraviy arxivlarda saqlanayotgan hujjatlar asosida shajara ma’lumotlarini tuzish;
- X. Sulaymonova nomidagi Respublika sud ekspertiza markazidagi DNK ma’lumotlari orqali fuqarolarning etnik kelib chiqishini aniqlash.
Bu fuqarolarga nafaqat o‘z avlodlarining ism-shariflari yoki qarindoshlik darajasini bilish, balki ularning tarixiy ildizlarini, etnik mansubligini va avlod tarmog‘ining qay yo‘nalishdan kelib chiqqanini ham anglash imkonini beradi.
Oila shajarasini shakllantirish xizmati davlat xizmatlari markazlari va my.gov.uz portali orqali uch asosiy tarixiy davr bo‘yicha taqdim etiladi:
1. IX asrdan 1917-yilgacha — qadimiy manbalar va arxiv hujjatlariga asoslangan ma’lumotlar;
2. 1918–1945-yillar — tarixiy o‘zgarishlar ko‘p bo‘lgan davr bo‘yicha arxiv ma’lumotlari;
3. 1946-yildan hozirgi kungacha — zamonaviy ma’lumotlar va raqamlashtirilgan manbalar asosida.
Mazkur tizim joriy etilishi bilan fuqarolar o‘z oila tarixiga ko‘proq qiziqish bildiradi, ajdodlarining yo‘lini yanada chuqurroq o‘rganish imkoniga ega bo‘ladi. Bu nafaqat shaxsiy ma’naviy ehtiyojni qondiradi, balki millat tarixini saqlash va avlodlar xotirasini asrashda ham muhim qadam hisoblanadi.
Kutilayotgan «Shajara» tizimi nafaqat O‘zbekistonda, balki mintaqada ham avlodlar tarixini elektron shaklda saqlash va tartibga solish bo‘yicha eng ilg‘or platformalardan biriga aylanishi mumkin.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
