Iqtisodiyot va moliya vazirligi kelasi yilgi davlat byudjetiga oid qonun loyihasini jamoatchilikka taqdim etdi. Hujjatda 2026-yilda ish haqi, pensiya, stipendiya va nafaqalarni oshirish uchun davlat 6 trln so‘m ajratishi belgilangan. Bu summa ayrim xizmat turlari narxining ko‘tarilishi va yangi ish o‘rinlari ochilishi bilan bog‘liq xarajatlarni ham qamrab oladi.
Qonun loyihasida aholi real daromadini saqlash maqsadida maosh va pensiyalar inflyatsiyadan yuqori darajada oshirib borilishi rejalashtirilgan. Prognozga ko‘ra, 2026-yilda inflyatsiya 7 foiz atrofida shakllanadi.
Vazirlik hisob-kitoblarida ma’lum qilinishicha, davlat xizmatchilari ish haqi 1 foizga oshirilsa, byudjetdan qo‘shimcha 1,697 trln so‘m, pensiya 1 foizga ko‘tarilsa, 832 mlrd so‘m ajratilishi kerak bo‘ladi.
2026-yilda ish haqi va ijtimoiy soliq xarajatlari uchun 172,8 trln so‘m yo‘naltirish rejalashtirilgan — bu joriy yilga nisbatan 18,5 trln so‘m ko‘p. Maoshlarga oid to‘lovlar umumiy davlat byudjeti xarajatlarining 42,9 foizini tashkil etadi.
Keyingi yilda stipendiyalar uchun 2,2 trln so‘m, pensiyalar uchun 86,1 trln so‘m, nafaqalar uchun esa 14 trln so‘mdan ortiq mablag‘ ajratiladi.
Avval e’lon qilingan Fiskal strategiyada maosh va pensiyalar 2026-yilda kamida 6–7 foizga oshirilishi ta’kidlangan edi.
Shu tariqa, davlat ijtimoiy xarajatlarini kengaytirish orqali aholi daromadini qo‘llab-quvvatlashni davom ettirmoqda.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
