30 dekabr kuni prezident Shavkat Mirziyoyev Yangi Toshkentdagi Sharq bahori turar joy majmuasi qurilish maydoniga tashrif buyurib, tayyor xonadonlardan birini ko'zdan kechirdi. Bu haqda podrobno.uz xabar beradi.
Sharq bahori Yangi Toshkentda uy-joyga bo'lgan talabni qoplash yo'lidagi dastlabki loyihalardan biri sanaladi. Mamlakatdagi eng yirik uy-joy qurilishi tashabbuslaridan bo'lgan mazkur majmua 95 gektar hududda barpo etilib, qariyb 15 ming xonadonga mo'ljallangan ko'p qavatli uylarni o'z ichiga oladi.
Majmua hududida 15 mingdan ortiq daraxt va butalar ekiladigan yashil zona tashkil etilishi rejalashtirilgan. Uylar avtonom isitish va sovitish tizimlari bilan jihozlanadi, tom qismi esa to'liq quyosh panellari bilan qoplanadi.
Hozirning o'zida qurilishning sezilarli qismi bajarilgan. Ishlarda “A+” toifasidagi energiya tejamkor zamonaviy materiallardan foydalanilmoqda.
Aholi avtomobillari uchun yer osti avtoturargohlar quriladi. Majmuadan 5–10 daqiqalik piyoda masofada park, metro bekati, shuningdek ma'muriy va jamoat binolari paydo bo'lishi ko'zda tutilgan.
Davlat rahbari ta'kidlashicha, Yangi Toshkentda birinchi bosqichda 600 ming aholi uchun zamonaviy infratuzilma shakllantiriladi. Loyiha to'liq yakunlangach esa hudud 2 million kishiga mo'ljallangan yirik megapolisga aylanishi kutilmoqda.
Bundan avval prezident Yangi Toshkentdagi asosiy infratuzilma ob'ektlari va yangi ma'muriy binolar qurilishini ham shaxsan borib ko'rgan edi.
“Zamin”ni Telegramʻda oʻqing!
