Yangi Toshkentda bunyodkorlik ishlari bilan tanishuv chog'ida prezident Shavkat Mirziyoev Chirchiq daryosi ustidan qurilayotgan yangi ko'prik va metro bekati bilan uyg'unlashtirilgan avtoturargoh loyihasini ko'zdan kechirdi. Mazkur tashabbuslar Toshkent va Yangi Toshkent o'rtasidagi transport aloqasini mustahkamlash, oqimlarni samarali boshqarish hamda aholining harakatlanishi uchun qulay va xavfsiz muhit yaratishga qaratilgan. Bu haqda podrobno.uz xabar beradi.
Qurilayotgan ko'prik poytaxtni Yangi Toshkent hududi bilan bog'laydi. Uning o'tkazuvchanligi sutkasiga 40–50 ming avtomobilni tashkil etishi rejalashtirilgan. Loyihaning birinchi bosqichi doirasidagi ishlar joriy yil oxirida boshlangan.
Ko'prik qurilishida ekologiya masalalariga alohida e'tibor qaratilmoqda: qirg'oq hududlarini obodonlashtirish va ko'kalamzorlashtirish, energiya tejamkor yoritish tizimlarini o'rnatish, piyodalar hamda velosiped yo'laklarini barpo etish ko'zda tutilgan. Shuningdek, ko'prik orqali ikki polosali tramvay liniyasini qurish ham rejalashtirilmoqda.
Prezidentga Yangi Toshkentni Toshkent bilan bog'laydigan 21 kilometrli yangi metro yo'nalishi loyihasi ham taqdim etildi. Ushbu yo'nalishda 9 ta zamonaviy bekat bo'lishi, kuniga 230 ming nafargacha yo'lovchiga xizmat ko'rsatishi kutilmoqda. Liniya amaldagi metropoliten tarmog'iga to'liq integratsiya qilinib, yagona transport tizimini shakllantiradi.
Davlat rahbari kelajakdagi bekatlardan birida olib borilayotgan qurilish jarayonini ham ko'rib chiqdi. Mazkur bekat 20 ming kvadrat metrli avtoturargoh bilan birlashtiriladi. Loyiha transport turlarining — avtomobil, piyoda va jamoat transporti oqimlarini aniq ajratishni nazarda tutadi, bunda xavfsizlik va funksionallik ustuvor etib belgilangan.
Hozirda ob'ektda yer ishlari va beton quyish jarayonlari davom etmoqda. Butun majmuani 2027 yilda ishga tushirish rejalashtirilgan. Prezident loyihalarning Yangi Toshkent rivoji uchun strategik ahamiyatini ta'kidlab, qurilish sifatini yuqori darajada ta'minlash va belgilangan muddatlarga qat'iy rioya etish bo'yicha topshiriqlar berdi.
Eslatib o'tamiz, 30 dekabr kuni Shavkat Mirziyoev Yangi Toshkentdagi “Yangi O'zbekiston” universiteti va Milliy kutubxona binolari qurilish maydonlariga ham tashrif buyurgan.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
