O'zbekistonda 2026 yil 1 yanvardan qishloq xo'jaligi mahsulotlarini (paxta va don bundan mustasno) sotishda qo'shilgan qiymat solig'i bo'yicha nol stavkani qo'llash tartibi joriy etiladi. Bu qoida mahsulotni bevosita yetishtirgan qishloq xo'jaligi tovar ishlab chiqaruvchilariga taalluqli bo'lib, 2025 yil 4 sentyabrdagi UP-153 farmoni bilan belgilangan. Bu haqda podrobno.uz xabar beradi.
Nol stavkadan foydalanish uchun belgilangan talablarga mos tadbirkorlik subyektlari soliq organlariga elektron shaklda murojaat yuborishi kerak. Arizani my3.soliq.uz portalidagi soliq to'lovchining shaxsiy kabineti orqali topshirish mumkin.
Buning uchun "Elektron hujjat aylanishi" bo'limidan "Yuridik shaxslarning soliq imtiyozlaridan foydalanish bo'yicha murojaati" xizmati tanlanadi. Ochilgan shaklda normativ-huquqiy hujjat turi sifatida O'zbekiston Respublikasi Prezidenti farmoni, soliq turi sifatida QQS hamda hujjat raqami sifatida UP-153 ko'rsatiladi. Imtiyozning amal qilish muddati va matni tizim tomonidan avtomatik shakllantiriladi.
Murojaatga tasdiqlovchi hujjatlar — kadastr ma'lumotlari yoki yer uchastkasini ijaraga olish shartnomasi kabi hujjatlar ilova qilinadi. Shuningdek, hudud, tuman va mahalla ko'rsatilishi, aloqa uchun telefon raqami kiritilishi majburiy.
Barcha ma'lumotlar to'ldirilgach, murojaat ko'rib chiqish uchun yuboriladi. Uni ko'rib chiqish muddati 15 kungacha, jarayon holatini esa shaxsiy kabinetdagi "Murojaatlar ro'yxati" bo'limida kuzatib borish mumkin.
Murojaat tasdiqlangandan so'ng nol stavkali QQS elektron hisob-fakturalarda avtomatik qo'llanadi hamda QQS bo'yicha hisobotlarni shakllantirishda inobatga olinadi.
Shuningdek, avvalroq Soliq qo'mitasi 2026 yil 1 yanvardan o'zini o'zi band qilgan taksi haydovchilari uchun ham soliqqa tortish tartibi o'zgarishini eslatgan: ular uchun aylanmadan olinadigan soliqning 1 foizlik pasaytirilgan stavkasi joriy etiladi. Idora ma'lumotiga ko'ra, haydovchilar va kuryerlardan to'lov qabul qilish uchun alohida QR-kod o'rnatish talab etilmaydi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
