SOVAZ portalida eʼlon qilingan “Oʻzbekiston–2030” strategiyasining yangilangan loyihasi energetika sektoriga oid ko‘rsatkichlarni keskin qayta ko‘rib chiqdi. Hujjatda yaqin besh yil uchun tabiiy gaz qazib olish bo‘yicha davlat kutgan natijalar ancha pasaytirilgani qayd etilib, avvalgi baland marralar amalda bekor bo‘layotgani ko‘rinadi. Bu haqda upl.uz xabar beradi.
Yangi tahrirda 2030 yil uchun maqsad 38,7 mlrd kub metr etib belgilangan. Bu 2023 yil sentyabrida tasdiqlangan rejadagi 62 mlrd kub metrlik ko‘rsatkichdan keskin past — yaʼni reja 37 foizdan ko‘proqqa qisqargan. Qizig‘i, 2025 yilning 11 oylik statistikasi 38,9 mlrd kub metrni ko‘rsatib, allaqachon 2030 yilga qo‘yilgan “marradan” ham yuqorida turibdi.
Strategiya 2026–2030 yillarda jami qazib olinadigan gaz hajmi 186,8 mlrd kub metr atrofida bo‘lishini taxmin qilmoqda. Yillik kesim esa yaqin muddatda pasayish davom etishini anglatadi: 2026 yilda 37,9 mlrd, 2027 yilda 35,6 mlrd, 2028 yilda esa 33,4 mlrd kub metrgacha tushish ehtimoli bor. Faqat 2029 yilda 23,3 foizli sakrash bilan 41,2 mlrd kub metrga chiqish prognoz qilingan, biroq 2030 yilga borib yana pasayish kutilmoqda.
Qayta belgilangan vazifalarni bajarish masʼuliyati Energetika vazirligi hamda “Oʻzbekneftgaz” zimmasiga yuklangan. Tahlilchilar so‘nggi to‘rt yilda sohada qazib olish 21,7 foizga qisqarganini eslatib, buning ortida strategik rejalashtirishdagi tizimli xatolar va qisqa muddatli muammolarga berilib ketish omili turganini taʼkidlashmoqda.
Hujjat ko‘rsatkichlari avvalroq Energetika vaziri Jurabek Mirzamahmudov bildirgan optimistik bayonotlar bilan ham “to‘qnash” kelmoqda: u o‘tgan yil dekabr o‘rtalarida pasayish 2026 yildayoq to‘xtatilishini aytgandi. Asosiy umid Qoraqalpog‘istondagi yangi konlarda ishlarni kuchaytirishga bog‘langan edi. Biroq yangi loyiha, yangi quvvatlar hisobiga ham yaqin yillarda umumiy manzara salbiyligicha qolishini ko‘rsatmoqda.
So‘nggi yillarda Oʻzbekiston, ilgari gaz eksportida yirik o‘yinchi bo‘lganiga qaramay, ichki talab oshgani va quduqlardagi debet pasaygani sabab Rossiyadan “Markaziy Osiyo – Markaz” quvurlari orqali revers rejimida import qilishga majbur bo‘ldi. Bu mintaqa energetika siyosatida yangi burilish sifatida baholanmoqda.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
