Ispaniyaning Talgo kompaniyasi Oʻzbekiston bozorida navbatdagi muhim gʻalabani qoʻlga kiritdi: “Oʻzbekiston temir yoʻllari” bilan Afrosiyob yoʻnalishlarida qatnaydigan yuqori tezlikdagi elektropoyezdlar parkiga uzoq muddatli servis bo‘yicha yirik kelishuv imzolandi. El Periódico Digital xabariga ko‘ra, shartnoma qiymati 80 mln yevroga baholanmoqda va u kelgusi 10 yilni qamrab oladi. Bu haqda upl.uz xabar beradi.
Bitim Talgo 250 rusumidagi olti tarkibga tegishli. Aynan shu poyezdlar mamlakatdagi tezkor temiryo‘l qatnovining “asosiy tarkibi” bo‘lib, yo‘lovchilar va sayyohlar orasida Afrosiyob brendi bilan yaxshi tanilgan. Ispan tomonida esa bu kelishuv so‘nggi yillarda mintaqadagi eng yirik servis loyihalaridan biri sifatida baholanmoqda.
Talgo va Oʻzbekiston temiryo‘l tizimi o‘rtasidagi hamkorlik 15 yildan oshdi: ilk yuqori tezlikdagi qatnovlar Toshkent – Samarqand yo‘nalishida ishga tushirilgan paytdan boshlab aloqa yo‘lga qo‘yilgan edi. Yangi shartnoma esa avvalgi yetkazib berishlardan kengroq ko‘lamga o‘tib, texnikaning butun “hayot sikli” bo‘yicha kompleks qo‘llab-quvvatlashni mustahkamlaydi.
Kelishuvga ko‘ra, Talgo mutaxassislari poyezdlarning texnik shayligini doimiy ushlab turish uchun to‘liq servis ishlarini bajaradi: rejalashtirilgan profilaktika, tizimlar diagnostikasi, turli murakkablikdagi tiklash ta’mirlari. Shuningdek, original ehtiyot qismlar va komponentlar uzluksiz yetkazib berilishi kafolatlanib, bekor turishlar xavfini kamaytirish hamda yo‘lovchi tashish xavfsizligini yuqori darajada ushlab turish ko‘zda tutilgan.
Talgo 250 (Afrosiyob) poyezdlari kuzovning passiv og‘ish tizimi bilan ajralib turadi: bu yechim burilishli uchastkalardan odatdagi ko‘rsatkichlardan 20–30% tezroq o‘tishga imkon berar ekan, yo‘lovchilar uchun qulaylik darajasi ham saqlanib qoladi.
“Zamin”ni Telegramʻda oʻqing!
