Joriy yilning 11–15 yanvar kunlari BAAning Abu-Dabi shahrida Abu Dhabi Sustainability Week 2026 xalqaro forumi bo‘lib o‘tdi. Barqaror rivojlanish, qayta tiklanuvchi energiya, iqlim moliyasi hamda “yashil” iqtisodiyot atrofida to‘plangan ushbu haftalikda 150 dan ortiq davlatlardan davlat idoralari, yirik kompaniyalar va nufuzli moliya institutlari rahbarlari ishtirok etdi.
Forum doirasida O‘zbekiston uchun muhim qadam tashlandi: O‘zbekiston Energetika vazirligi, Masdar va Emirates Utilities Development Company (EUDC) o‘rtasida mamlakatda 24/7 rejimida — ya’ni sutka davomida uzluksiz ishlaydigan — 1 GVtgacha bazaviy yuklama quvvatini ta’minlaydigan loyihani ishlab chiqish bo‘yicha hamkorlik hujjati imzolandi.
Mazkur tadbirda O‘zbekiston bosh vaziri o‘rinbosari Jamshid Xo‘jayev, energetika vaziri Jo‘rabek Mirzamahmudov, BAA energetika va infratuzilma vaziri Suhayl Muhammad al-Mazruiy, shuningdek Masdar kompaniyasi bosh ijrochi direktori Muhammad Jamil Al Ramahiy ishtirok etdi. Qayd etilishicha, hujjatlar “O‘zenergosotish” AJ, Masdar va Etihad Water & Electricity (EUDC’ning bosh kompaniyasi) tomonidan rasman imzolangan.
Ma’lumotlarga ko‘ra, loyiha sutka bo‘yi to‘xtamay ishlaydigan quvvatlarni yo‘lga qo‘yishni ko‘zda tutadi. Bu esa qayta tiklanuvchi energetikada ko‘p muhokama qilinadigan bazaviy quvvat muammosiga amaliy yechim bo‘lishi, energiya ta’minotidagi uzilishlarni qisqartirishi va ishonchli “yashil” energiyaga o‘sib borayotgan talabni qondirishga xizmat qilishi mumkin.
Shu bilan birga, tashabbus raqobatbardosh tariflar asosida katta hajmda bazaviy quvvat ishlab chiqarish imkonini ochishi, kelgusida esa xalqaro miqyosda ham qo‘llanishi mumkin bo‘lgan namunaviy loyiha sifatida ko‘rilayotgani ta’kidlandi. Ya’ni, bu faqat bitta loyiha emas — kelajakdagi yirik “yashil” energetika modellariga yo‘l ochadigan tajriba bo‘lishi ham ehtimol.
“Zamin”ni Telegramʻda oʻqing!
