Toshkent xalqaro aeroporti hududidagi bir nechta avtostoyankalar xususiy boshqaruvga o‘tkazilishi rejalashtirilmoqda. Uzbekistan Airports kompaniyasi ularni E-auksion.uz orqali auksionga qo‘ydi.
Savdoga P1, P3–P5, P7 va P8 parkovkalari qo‘yilgan bo‘lib, ularning umumiy maydoni 40 ming kvadrat metrdan ortiqni tashkil etadi. Bu hudud taxminan 1,5 mingta avtomobil uchun mo‘ljallangan.
Ijara muddati 3 yil etib belgilangan va boshlang‘ich narx yiliga 48,7 mlrd so‘mni tashkil qiladi. Shuningdek, operator tushumidan qo‘shimcha ravishda 5 foiz to‘lov amalga oshiriladi.
Yangi ijarachi barcha jarayonlarni to‘liq raqamlashtirishi, elektromobillar uchun quvvatlash stansiyalarini o‘rnatishi hamda onlayn bronlash va raqam tanish tizimlarini joriy etishi shart bo‘ladi.
Bundan tashqari, operator rekonstruksiya va obodonlashtirish ishlariga sarmoya kiritishi lozim. Auksion savdolari 2026 yil 19 may kuniga belgilangan.
“Zamin”ni Telegramʻda oʻqing!
