Prezident Shavkat Mirziyoyev 8 may kuni Ikkinchi jahon urushi qatnashchilari va mehnat fronti faxriylarini ziyorat qilib, ularni bayram bilan samimiy tabrikladi. Bu uchrashuv nafaqat rasmiy tadbir, balki avlodlar o‘rtasidagi hurmat, minnatdorlik va tarixiy xotira ifodasi sifatida ham katta ma’naviy ahamiyat kasb etdi.
Davlatimiz rahbari Qurolli Kuchlar Bosh harbiy klinik gospitalida Akmal ota Akramov, Vera Juravskaya, Hasanboy ota Xalmatov va Vladimir Alekseykov bilan dildan suhbatlashdi. Prezident nuroniylarning hol-ahvoli, salomatligi, kayfiyati bilan qiziqib, ularning og‘ir, sinovli va ibratli hayot yo‘lini alohida e’tirof etdi.
Uchrashuv davomida urush yillarida va mehnat frontida ko‘rsatilgan matonat, sabr-bardosh va fidokorlik xalqimiz xotirasida abadiy saqlanishi ta’kidlandi. Zero, bugungi tinch va osoyishta kunlar, farzandlarimiz va nabiralarimizning erkin hayoti aynan ana shunday jasoratli insonlarning mehnati, mardligi va sabri evaziga barpo bo‘lgan.
– Sizlar tarixning jonli guvohi, matonat timsolisizlar. Sizdek tabarruk insonlar bilan uchrashish, o‘gitlaringizni tinglash bizga katta ma’naviy kuch bag‘ishlaydi. Xalqimiz sizlar bilan haqli ravishda faxrlanadi. Bugungi tinch va ozod kunlar, avlodlarning baxtiyor istiqboli sizlarning mislsiz fidokorligingiz mahsulidir. Sizlarning ibratli hayot yo‘lingiz yoshlarimiz uchun haqiqiy matonat maktabidir, – dedi Prezident.
Prezidentning joriy yil 16 apreldagi qaroriga muvofiq, mamlakatimizda urush va mehnat faxriylariga yuksak ehtirom ko‘rsatilmoqda. Bu bejiz emas. Chunki xalq o‘z tarixini, o‘z qahramonlarini unutmasa, kelajakka ham ishonch bilan qadam tashlaydi. Xotira bor joyda qadr bor, qadr bor joyda esa ma’naviy kuch bor.
Ikkinchi jahon urushi qatnashchilari, front orti faxriylari, shuningdek, mustaqillik yillarida xizmat burchini bajarish chog‘ida halok bo‘lgan harbiy xizmatchilarning oila a’zolari davlatning doimiy e’tibor va g‘amxo‘rligida ekani ta’kidlandi. Ularga moddiy va ma’naviy ko‘mak ko‘rsatish bilan birga, salomatliklarini tiklash uchun respublikamizning eng yaxshi sanatoriylariga imtiyozli yo‘llanmalar ajratilgan.
– Yaratgan sizlarga vatanparvarlik va fidokorona mehnatingiz mukofoti sifatida uzoq umr, el-yurt ardog‘ida yashash baxtini ato etgan. Sizlarning duolaringiz yurtimiz uchun omonlik, ishlarimizga barakadir, – dedi Prezidentimiz.
Uchrashuvda nuroniylar ham mamlakatimizda tarixiy xotirani tiklash, keksalarni e’zozlash, faxriylarga munosib hurmat ko‘rsatish borasida amalga oshirilayotgan ishlar uchun davlatimiz rahbariga minnatdorlik bildirdi. Ularning samimiy duolari, hayotdan roziligi va yoshlarga qarata aytgan o‘gitlari uchrashuvga yanada iliqlik bag‘ishladi.
Bunday muloqotlar jamiyat uchun juda muhim. Chunki faxriylar — kitoblardagi tarix emas, ko‘z o‘ngimizda turgan tirik ibrat maktabidir. Ular ko‘rgan qiyinchilik, ular chekkan mashaqqat va ular saqlab qolgan tinchlik bugungi avlod uchun katta saboqdir.
Eng muhimi, bu uchrashuv yana bir haqiqatni eslatdi: tinchlik o‘z-o‘zidan kelmagan, osoyishta hayot esa bebaho ne’mat. Uni asrash, qadriga yetish va kelajak avlodlarga yetkazish har birimizning burchimizdir.
“Zamin”ni Telegramʻda oʻqing!
