17:13 / 21.03.2022

Shavkat Mirziyoev Oʻzbekiston xalqini Navroʻz bayrami bilan tabrikladi (foto)

Toshkent shahridagi Humo Arena majmuasida 21 mart kuni Navroʻz bayrami shodiyonasi boʻlib oʻtdi. Tantanali tadbirda Oʻzbekiston prezidenti Shavkat Mirziyoev ishtirok etib, barchani bayram bilan tabrikladi, deb xabar beradi davlat rahbarining matbuot xizmati.

Navroʻzda tabiatda roʻy beradigan uygʻonish va yangilanish yurtimizdagi oʻzgarishlarga uygʻun. Soʻnggi besh yilda Harakatlar strategiyasi asosida barcha sohalar rivojlantirildi, hududlar qiyofasi yangilandi. Bunday ishlarni davom ettirish maqsadida 2022 yilda Yangi Oʻzbekiston taraqqiyot strategiyasi hamda «Inson qadrini ulugʻlash va faol mahalla yili» dasturi qabul qilindi.

«Mehnatkash va olijanob xalqimiz milliy rivojlanishning yangi davriga ulugʻvor maqsad va amaliy ishlar bilan kirib bormoqda», — deydi davlat rahbari.

Ta'kidlanishicha, buning tasdigʻini har bir oila, har bir mahalla, qishloq va ovullar, shaharlarimiz misolida yaqqol koʻrish mumkin. Mamlakatda yuzlab zamonaviy korxonalar, yoʻl va kommunikatsiya tarmoqlari, uy-joylar, yangi bogʻcha va maktablar, oliygohlar hamda madaniyat maskanlari, tibbiyot va sport inshootlari barpo etilmoqda.

^{Foto: Prezident matbuot xizmati}
Barcha hududlarda «Yangi Oʻzbekiston» bogʻlari, «Yangi Oʻzbekiston» massivlari bunyod qilinmoqda. «Obod mahalla» va «Obod qishloq» dasturlari qatorida butun mamlakat boʻylab «Yashil makon» umummilliy loyihasi amalga oshirilmoqda. Shu kunlarda odamlar hasharlar qilib, koʻchat va gullar ekib, yangi bogʻlar, sayilgohlar yaratmoqda.

^{Foto: Prezident matbuot xizmati}
Prezident oʻz tabrigida Navroʻzning mohiyati, mamlakatdagi tinchlik-osoyishtalikning qadri haqida alohida toʻxtalgan.

«Navroʻzi olam bizni tabiat farzandi boʻlib, vatan tuprogʻini, ona zamindagi har bir giyohni, koʻzimizga toʻtiyo qilib yashashga oʻrgatadi. Navroʻz hammamizga insoniylik, mehr-oqibat va bagʻrikenglik fanidan saboq beradi. Shu fayzli lahzalarda barchamiz tinchlik va osoyishtalik naqadar bebaho ne'mat ekanini, uning qadr-qimmati va ahamiyatini yaxshi anglaymiz. Bugungi murakkab dunyoda xalqimiz hayotini, farzandlarimiz kelajagini, musaffo osmonimizni asrab-avaylash uchun har birimiz mas'ul va javobgar ekanimizni yanada chuqurroq his etamiz», — deydi Shavkat Mirziyoev.

Prezident bayramda ishtirok etayotgan diplomatik korpus vakillarini, chet ellardagi vatandoshlarni ham samimiy tabriklagan. Shuningdek, 22 mart kuni nishonlanadigan Mahalla kuni munosabati bilan ushbu tizim faollari, oqsoqollar, hokim yordamchilari va yoshlar yetakchilari qutlangan.

Bayram tadbiri katta kontsert dasturi bilan davom etgan. Ushbu tantanadan soʻng, prezident Shavkat Mirziyoev Navroʻz saylida ishtirok etdi, milliy madaniyat markazlari, folklor-etnografik jamoalar chiqishlarini kuzatgan. Prezident bayramga kelgan odamlar bilan suhbatlashib, ularni tabriklagan.

^{Foto: Prezident matbuot xizmati}

^{Foto: Prezident matbuot xizmati}
Eslatib oʻtamiz, 17 mart kuni Oʻzbekiston prezidenti Shavkat Mirziyoev «2022 yilgi Navroʻz umumxalq bayramiga tayyorgarlik koʻrish va uni oʻtkazish toʻgʻrisida»gi qarorni imzolagan edi. Unga muvofiq, bayramda mamlakatda «Assalom, Navroʻz – yangilanish, mehr-oqibat va qadr-qimmat ayyomi!» degan bosh gʻoya asosida umumxalq sayllari shaklida keng nishonlanishi, Qoraqalpogʻiston, viloyatlar markazlari va Toshkent shahrida, shuningdek, barcha shahar va tumanlar, qishloq va ovullarda umumxalq sayllari shaklida oʻtkazilishi belgilangandi.

Keyinroq davlat rahbarining «2022 yilda rasmiy sanalarni nishonlash davrida qoʻshimcha ishlanmaydigan kunlarni belgilash va dam olish kunlarini koʻchirish toʻgʻrisida»gi farmoniga koʻra, mart oyida haftasiga besh kun ishlaydigan xodimlar uchun besh kun ketma-ket dam olish kunlari boʻlishi, barcha xodimlar uchun 22 mart, seshanba va 23 mart, chorshanba kunlari dam olish kuni etib belgilangani xabar qilindi.

Shavkat Mirziyoyev1 Navro‘z bayrami1 Humo Arena majmuasi1 Tantanali tadbir1