Terma jamoamiz a’zosi bilan final oldidan suhbat: "O‘yindan oldin bizga juda yaxshi motivatsiya beradi"

O‘zbekiston U-23 terma jamoamiz yarim finalda Yaponiyadek kuchli raqibni xotirjamlik bilan dog‘da qoldirishga muvaffaq bo‘ldi.

Garchi stadionga muxlislar kiritilmaganiga qaramasdan yigitlarimiz vatan uchun bor kuchini berishdi. Endi bo‘lsa, oldinda oxirgi o‘yin – Saudiya Arabistoniga qarshi final turibdi.

Terma jamoamizdagi barcha yigitlar yuqori salohiyatga ega va katta iqtidori borligi bilan ham maqtana olamiz. Ana shunday yigitlarimizdan biri himoyachi Odilbek Abdumajidov bo‘lib, yaponlarga qarshi bahsda o‘z pozitsiyasida bexato to‘p surdi. Sports.uz muxbiri esa ushbu futbolchi bilan suhbatda bo‘ldi.

- Odilbek, Yaponiyaga qarshi muhim uchrashuvda terma jamoamiz har jihatdan yaxshi o‘yin namoyish etdi. Bunday katta o‘yidan qanday taassurotlar qoldi?
- Bilasiz, Yaponiya termasi Osiyoda juda kuchli jamoalardan biri hisoblanadi. Shunga yarasha uchrashuv nihoyatda qiyin kechdi. Allohga shukr, Yaratgan egam bizga yutishni nasib qilgan ekan, mana, muhim g‘alabani qo‘lga kiritdik.

- Stadionga muxlislar kiritilmadi. Ishqibozlarsiz o‘ynash qanday tuyuldi? Baribir bunday muhim pallada ularning daldasini his qilmaslik jamoaga ta’sir ko‘rsatishi ham mumkin edi. Ayting-chi, bu jarayonni qanday yengib o‘tdinglar?
- Futbolda hamma narsa bo‘lishi mumkin. Stadionga muxlislar kiritilmagan taqdirda ham ortimizda butun O‘zbekiston turganini his qilib turdik. Xudoga shukr, yuzimiz yorug‘ bo‘ldi.

- O‘yindan oldin bosh murabbiy Timur Kapadzening ko‘rsatmasi qanday edi? Har qalay yaponlarga deyarli imkoniyat qoldirmadik...
- Ularning kuchli hamda kuchsiz taraflarini bizga yaxshilab tushuntirib berdi. Shunga asosan qo‘ldan kelganicha harakat qildik. Garchi bizga bergan ko‘rsatmalarini to‘liq bajara olmagan bo‘lsak-da, muhimi g‘alaba qozonish nasib qildi.

- Umuman olganda, Kapadze sizlarni qanday so‘zlar bilan ruhlantirdi?
- O‘yindan oldin bizga juda yaxshi motivatsiya beradi. Buni oddiy so‘z bilan ifodalashim qiyin.

- Yaponiya terma jamoasida ayniqsa Suzuki futbolchilarimizga bir muncha muammolar tug‘dirishga urindi. U zaxiraga olingach, sizlarga ancha yengillik bo‘ldimi?
- Bu futbolchini yaxshi mahoratga egaligini aytishgandi. Biz ham shunga qarab yaxshilab tayyorlandik. Lekin o‘sha o‘yinchi bizga unchalik qiyinchilik tug‘dirmadi.

- Finaldagi raqibimiz – Saudiya Arabistoni ham munosib o‘yin ko‘rsatib kelyapti. Sizningcha, raqiblar orasida eng kuchlisimi?
- Albatta. Axir ular bekorga finalgacha yetib kelishmadi.

- Demoqchimanki, har qiluvchi uchrashuvga doimgidan-da boshqacharoq tayyorgarlik ko‘rasizlarmi? Finaldan nimani kutyapsiz?
- Hammasi Allohdan. Biz sababchimiz xolos. Xudo xohlasa, yaxshi tayyorgarlik ko‘rib, chempion bo‘lamiz. Bu asosiy maqsadimiz.

- Saudiyaliklarni finalgacha o‘tkazgan o‘yinlarini ko‘rdingizmi? Masalan, qaysi pozitsiyasi ancha kuchli?
- Ha, ularning o‘yinlarini ko‘rdim. Saudiya Arabistoni termasi ham hujumkor o‘yin namoyish etadi. Shunga monand barcha futbolchilari tezkor. Lekin biz puxta tayyorgarlik ko‘rib, eng yaxshi o‘yinimizni ko‘rsatamiz.

- Adashmasam, faoliyatingizda bu birinchi final, shundaymi?
- Bunday katta chempionatda birinchisi.

- Siz uchun dastlabki final ekanini hisobga olsak, qo‘shimcha his-hayajonlar sezilyaptimi? Bunday mahalda ruhan kuchli bo‘lish ham juda muhim...
- Hayajon yo‘q, ammo uchrashuvga bo‘lgan mas’uliyat bor. Xudo xohlasa, biz uchun ota-onamiz, murabbiylarimiz, xalqimiz, barcha-barchalari duodalar. Nasib bo‘lsa, hammasi jamoamiz uchun yaxshi yakun topadi.

- Demak, faoliyatingizda bo‘lajak eng katta va eng jiddiy o‘yin, to‘g‘rimi?
- Shunaqa desa ham bo‘ladi. Chempionlikni qo‘lga kiritish albatta bizga nasib qiladi, deb umid qilaman.

- O‘ta muhim bahs oldidan muxlislarga qanday gapingiz bor?
- G‘alaba ham, mag‘lubiyat ham Xudodan. Biz g‘alaba uchun borimizni beramiz, bu aniq. Chunki butun e’tiborimizni ushbu uchrashuvga qaratganmiz. Xalqimizdan duoda bo‘lishlarini so‘rayman. “Zamin” yangiliklarini “Telegram”da kuzatib boring