Ulug‘bek Baqoyev: "Xolisona fikr yuritsak, "Navbahor" g‘alabaga haqliroq edi"

O‘zbekiston Superligasi 18-turidan o‘rin olgan "So‘g‘diyona" - "Navbahor" uchrashuvidan so‘ng tashkil etilgan matbuot anjumanida jizzaxliklar bosh murabbiyi Ulug‘bek Baqoyev quyidagi fikrlarni bildirib o‘tdi:

- "Namanganliklar biroz ustunlik namoyish etganini hamma ko‘rdi. Chunki bizning taqvim juda zich, 24 kun ichida 8-o‘yinda maydonga tushdik. Inson organizmi bunga dosh berishi mushkul. Shuning uchun ham bu bellashuvga aniq reja ishlab chiqqandik. Raqib bugungi o‘yinga ko‘proq tayyorlandi va menimcha, ular ko‘prog‘iga loyiq edi.

1 ochko qo‘lga kiritganimizni yutuq deb hisoblasak bo‘ladi. Shu sababli shogirdlarimni tabriklab o‘tmoqchiman. Endi oldimizda turgan uchrashuvlar haqida o‘ylashni boshlashimiz lozim", - dedi Ulug‘bek Baqoyev.

- Bu bahs "So‘g‘diyona" Superligadan ko‘ra ko‘proq OFK va O‘zbekiston Kubogiga e’tibor qaratmoqchiligini isbotlagandek ko‘rindi. Buning sabab tarkibmi?
- Yo‘q, bilasizmi, biz uchun har bir o‘yin muhim. Bir necha futbolchi jarohat olgani va yoshlarimiz terma jamoalardan chaqiruv olganini inobatga olsak, rotatsiya ham to‘liq kechmayapti. Bugungi o‘yin rejasida 3 ta hujumkor futbolchi bilan harakat qilish bor edi. Shunchaki ularni ikkinchi taymda maydonga tashladim va ular bahs tempini oshira oldi. Kimga qarshi maydonga tushishimizdan qat’i nazar, kuchimizni teng taqsimlashga harakat qilamiz.

- Sizning boshqaruvingizdagi "So‘g‘diyona" zerikarli futbol namoyish etadi deb hisoblaysizmi?
- Barchaning futbolga o‘z qarashi bor. Murabbiy va jamoa rahbarlariga nima muhim? Albatta, natija! Chiroyli o‘ynab 15-o‘rinda yursangiz, bu kimga yoqadi? Biz natija va muxlislar uchun o‘ynaymiz. Bu bizning uslub, bizning falsafamiz.

- Bugun jamoangiz ko‘proq durang uchun harakat qildi. Bu fikrga qo‘shilasizmi?
- Ta’kidlaganimdek, "Navbahor" kuchliroq o‘ynadi. Ammo biz ham harakat qildik. Xolisona fikr yuritsak, ular g‘alabaga haqliroq edi.

- Nima uchun durangga o‘ynadi? Bugungi g‘alaba "So‘g‘diyona"ning chempionlik poygasidagi imkoniyatlarini oshirishi aniq edi. Yoki jamoangizning kuchi g‘alaba qozonishga yetmasdi deb hisobladingizmi?
- 24 kun ichida 8-o‘yinda maydonga tushganimiz haqida aytib o‘tdim. Inson tanasi temir emas. U 15-20-30 daqiqa harakat qilishi mumkin. Ammo butun bellashuv davomida bir xil temp namoyish eta olmaydi. Shuning uchun ham biz rokirovkaga qo‘l urdik. Albatta, gol urishga harakat qildik, biroq bunday bo‘lmadi.

- O‘zbekiston Kubogi yarim finalidan o‘rin olgan "Navbahor"ga qarshi bo‘lajak bahs haqida fikringiz qanday?
- Turnir jadvalida yonma-yon borayotgan jamoalar o‘rtasidagi uchrashuv qiziq kechishi aniq. Namanganda futbol atmosferasi muxlislar bilan juda ajoyib bo‘ladi. Menimcha, bizni qiziqarli o‘yin kutib turibdi.

- Jamoangizning 3 ta frontda kurash olib borayotgani qiyinchilik tug‘dirmaydimi?
- Juda qiyin! Tiklanish jarayoni ancha og‘ir kechyapti. Shogirdlarimning barchasiga hurmat izhor etaman va minnatdorchilik bildirmoqchiman. “Zamin”ni Telegramʻda oʻqing!