Shomurodov ustozini Italiyaga chorladi: "... shuning uchun ham Karpin A Seriyada ishlashga qodir!"

20 noyabr kuni Oʻzbekiston milliy terma jamoasi “Paxtakor” stadionida Rossiya milliy terma jamoasi bilan xalqaro oʻrtoqlik uchrashuvida kuch sinashadi.

Boʻlajak bahsni mamlakatimiz bosh jamoasi sardori Eldor Shomurodov uchun ahamiyati katta. Chunki Rossiya milliy termasini ayni paytda hujumchimizga “Rostov”da oʻynab yurgan kezlari ustozlik qilgan Valeriy Karpin boshqarmoqda.

Rossiya futbolini yorib borayotgan https://matchtv.ru sayti oʻrtoqlik oʻyini oldidan Eldor Shomurodovning fikrlarini futbol jamoatchiligi e'tiboriga havola qildi.

- Avval Rossiya terma jamoasi bilan biror marotaba oʻynamaganimiz bois, boʻlajak oʻyin haqida biror aniq fikr aytolmayman. Biroq bellashuv juda qizgʻin oʻtishini kutyapman.

Karpin haqidagi taassurotlarim qanday? Bir narsani aniq aytishim mumkinki, Evropada oʻynay boshlagan davrimda uning maslahatlari sharoitga koʻnikishimda juda qoʻl keldi.

Professionalizm nuqtai nazaridan Karpin “Rostov”da oʻynagan paytim juda koʻp koʻmaklashgan. Uning maslahatlari orqali Evropadagi faoliyatim ancha engil boshlandi.

“Rostov”da taktika ustida juda koʻp ishlardik, shuning uchun ham Karpin A Seriyada ishlashga qodir, - dedi Eldor Shomurodov sayt ijodkorlariga.

Eldor Shomurodov aslida “Mash'al” tarbiyalanuvchisi hisoblanadi. Keyinchalik “Bunyodkor”ga koʻchib oʻtgan hujumchi 2017 yilda legionerga aylandi.

Evropa futbolini koʻzlagan surxondaryolik futbolchi uch yil mobaynida Rossiya premer-ligasida mahoratini tobladi. Futbol mutaxassislari “Rostov” bosh murabbiyi sifatida ishlagan Valeriy Karpin Eldorning hujumchi sifatida yangi qirralarini ochganini e'tirof etishadi.

Bundan tashqari, rossiyalik mutaxassis 2020 yili mavsumning qizgʻin pallasida jamoasining asosiy hujumchisi hisoblangan Eldor Shomurodovni “Jenoa”ga koʻchib oʻtishiga imkoniyat yaratib berdi.

Shomurodov Genuya klubida bir mavsumda sakkizta toʻp kiritganidan keyin unga bir necha jamoalardan chorlov boʻldi. Eldor oʻzi shaxsan tanigan mutaxassis – Joze Mourino taklifini qabul qilib, “Roma”ga koʻchib oʻtdi.

Afsuski, Eldorning Italiya poytaxtidagi faoliyati hamma kutganidek silliq kechmayapti. Mourino hamyurtimizga ketma-ket ikkinchi mavsum etarli oʻyin amaliyoti taqdim qilayotgani yoʻq.

Yanvar oyida Italiyaning oʻzidan bir necha klub Shomurodovni oʻz tarkibiga qoʻshib olishga harakat qilishi kutilmoqda. Potentsial xaridorlar qatorida “Torino”, “Balonya”, “Sampdoriya”, “Montsa” kabi jamoalar tilga olinmoqda.

Shunga qaramay, Eldor Shomurodovning Oʻzbekiston milliy terma jamoasidagi faoliyati muvaffaqiyatli davom etyapti. Hujumchimiz Qozogʻiston futbolchilari bilan boʻlgan oʻyinda raqib darvozasini ishgʻol qilib, terma jamoamiz gʻalabasini ta'minladi.

Futbol transferlari va statistikasiga ixtisoslashgan https://www.transfermarkt.world portaliyada qayd etilishicha, Eldor Shomurodov terma jamoa safida 58 uchrashuvda gollari sonini 32 taga etkazib oldi. “Zamin” yangiliklarini “Telegram”da kuzatib boring