Mundial taqvimi. A guruhi jamoalari haqida nimalarni bilishingiz kerak?

^{Niderlandiyalik muxlislar. Foto Global Look Press}
Kecha, 20 noyabr kuni Qatarda futbol boʻyicha jahon chempionati start oldi. Turnirning final bosqichiga etib kelgan jamoalarning imkoniyatlarini baholaymiz.

A guruhi. Qatar, Ekvador, Senegal, Niderlandiya
V guruhi. Angliya, Eron, AQSh, Uels
C guruhi. Argentina, Saudiyaya Arabistoni, Meksika, Polsha
D guruhi. Frantsiya, Avstraliya, Daniya, Tunis
E guruhi. Ispaniya, Kosta-Rika, Germaniya, Yaponiya
F guruhi. Belgiya, Kanada, Marokash, Xorvatiya
G guruhi. Braziliya, Serbiya, Shveytsariya, Kamerun
H guruhi. Portugaliya, Gana, Urugvay, Janubiy Koreya.

A guruhi. Qatar, Ekvador, Senegal, Niderlandiya

A guruhi oʻyinlari taqvimi
20 noyabr
21.00 Qatar — Ekvador 0:2

21 noyabr
21.00 Senegal — Niderlandiya

25 noyabr
18.00 Qatar — Senegal
21.00 Niderlandiya — Ekvador

29 noyabr
20.00 Niderlandiya — Qatar
20.00 Ekvador — Senegal
Qatar
Mezbonlar jahon chempionati debyutiga puxta tayyorgarlik koʻrishgan — bahordayoq milliy jamoaning barcha a'zolari turnirga maqsadli tayyorlanish uchun klublaridan chaqirib olingan, shunday ekan, qatarlik futbolchilarda oʻzaro tushunib oʻynash borasida muammo boʻlmasligi aniq. Ammo buning ikkinchi tomoni ham bor: apreldan buyon bu futbolchilar faqat oʻrtoqlik uchrashuvlarida maydonga tushishgan. Bu oʻyinlardagi natijalar ham yaxshi taassurot qoldirmaydi: masalan, sentyabr oyida Feliks Sanches jamoasi Xorvatiya olimpiya jamoasiga yirik hisobda yutqazdi.

Qatar hukumati munosib ishtirok uchun barcha ishni qildi, ammo yarim yil ichida futbolchilarning darajasi oʻsib qolmagan. Chunki daraja oldindan yuqori emasdi. Qatar kimdandir ochko olishi mumkin, ammo ular pley-offga chiqa olmaydi.

Ekvador
Ekvador saralash turnirida koʻpchilikni hayron qildi: Peru, Kolumbiya, Chili va Paragvay ortda qoldirildi. Milliy jamoaning eng taniqli yuzlari — Enner Valensiya va Pervis Estupinyan, ammo argentinalik murabbiy Gustavo Alfaro jahon miqyosidagi yulduz futbolchilarsiz ham jahon chempionatiga chiqishni uddaladi. Toʻgʻri, iyunda FIFA Ekvadorni diskvalifikatsiya qilishiga bir baxya qolgandi — federatsiya terma jamoada qalbaki hujjatlarga ega boʻlgan futbolchini (Bayron Kastilo) oʻynatishda ayblandi.

Tashqi muammolar hisobga olinmaganda, janubiy amerikaliklarda barchasi yaxshi. Ular guruhda Senegal bilan raqobatlashadi, ammo 1/8 final — Ekvador uchun eng yaxshi natija boʻladi.

Senegal
Afrikaning amaldagi chempionlarida turnir arafasida jiddiy ustunlik bor edi — Sadio Mane. «Bavariya» hujumchisi bu kuzda koʻplab gollar urdi va JChga yuqori sport formasida etib kelayotgandi, ammo tanaffus arafasida «Bavariya»ning soʻnggi oʻyinida jarohat oldi va Qatarga kelmaydigan boʻldi. Senegalning baxtiga «Chelsi» darvozaboni Eduar Mendi jarohatdan tuzalib, safga qaytdi.

Ammo Ekvador bilan boʻlgani kabi, afrikaliklar jamoasi ham tashqi zarbaga duch keldi — hujumchi Keyta Balde sentyabr oyida antidoping qoidalarini buzgani uchun uch oyga diskvalifatsiya qilindi va jahon chempionatini oʻtkazib yuboradigan boʻldi.

Senegal guruhdan chiqish uchun yaxshi imkoniyatga ega, ammo undan uyogʻiga davom etishi dargumon.

Niderlandiya
«Apelsinranglar» jahon chempionatiga turnirning emas, guruh favoriti sifatida qaytishmoqda. Memfis Depay, Frenki de Yong, Virjiyl van Deyk va jamoaning boshqa yulduzlari faoliyatidagi eng yaxshi mavsumni oʻtkazmayapti. Niderlandlarda forvard va darvozabon ampluasida jiddiy muammolar bor: muntazam gol uradigan hujumchi shunchaki yoʻq, jamoaning soʻnggi oʻyinlarida darvozani 39 yoshli Remko Pasver qoʻriqladi.

Lui van Gaal uchun bu terma jamoa boshqaruvidagi soʻnggi yirik turnir — jahon chempionatidan keyin u oʻrnini Ronald Kumanga boʻshatib beradi. Jamoa van Gaal boshqaruvidagi soʻnggi turnirda hayron qoldirgandi — JCh-2014da uchinchi oʻrinni egallagandi. Hozirda jamoada chorakfinal uchun yaxshi imkoniyat bor, ammo kuchli toʻrtlikka kirish syurpriz sifatida koʻriladi. “Zamin” yangiliklarini “Telegram”da kuzatib boring