APLning yangi yulduzi Mixail Mudrik haqida

Ukrainalik "Liverpul" himoyachilarini rostakamiga terlashga majbur qildi. Ukrainalik futbolchi Mixail Mudrik "Chelsi" safida biroz oldin "Liverpul"ga qarshi o‘yinda debyut qildi. Mixail 55 chi daqiqada Luis Xollning o‘rniga maydonga tushirildi.

E’tiborli tomoni ukrainalik garchi gol urmagan bo‘lsada, o‘zini yaxshi tomonlama ko‘rsata oldi. 35 daqiqa ichida 4 ga yaqin xavfli vaziyat yaratgan Mudrik foydali harakatlar ko‘rsatkichi bo‘yicha 92.9 foiz natija qayd etdi (o‘yindagi eng yaxshi ko‘rsatkich).

Matbuot anjumanlarida o‘zini o‘ta xotirjam tarzda tutib kelayotgan futbolchi yashil maydonda ham bosiq va vazmin holda vaziyatlarni to‘g‘ri baholay olishini namoyish qildi. Dario Srna "Mixail o‘z pozitsiyasida Mbappe va Vinisiusdan keyin 3 chi futbolchi" deganida ko‘pchilik kulgandi, ammo ko‘rib turganingizdek ukrainalik "Liverpul" himoyachilarini rostakamiga terlashga majbur qildi. Shubham yo‘qki, Potter futbolchini keyingi o‘yinda asosiy tarkibga kiritadi. Ukrain murabbiyni shunga "majbur" qildi.

Mudrik bugungi o‘yini bilan APLga yana bir yulduz tashrif buyurgani, u bilan endi ehtiyot bo‘lib muomalada bo‘lishlari kerakligi haqida jar solgandek bo‘ldi. Tumanli albion himoyachilari va darvozabonlari 22 yoshli vingerning harakatlarini o‘ychan tarzda kuzatishgan bo‘lsalar kerak. Ukrainalik futbolchilar ichida eng qimmatbahosiga aylangan Mudrik, sifat va sovrinlar bo‘yicha ham eng zo‘ri bo‘lishni uddalaydimi yoki yo‘q buni vaqt ko‘rsatadi. Hozircha taxtni Andrey Shevchenkodek daho egallab turibdi...

“Zamin” yangiliklarini “Youtube”da kuzatib boring